Pa December 17, 2020, Khoti la Leninskiy ilo lili ku Rostov-on-Don likati Mubali Ruslan Alyev wali na mulandu, ndipo likeruzga kuti waleke kusangikaso na mulandu unyake kwa vyaka viŵiri na hafu. Pasono mubali withu ŵamumujalira mu jele yayi.

Apo mulandu wake ukaŵa pafupi kweruzgika, Mubali Ruslan wakalongora kuti wali na “mtende wa Chiuta.” (Ŵafilipi 4:7) Uku mtima uli m’malo wakaphalira ŵabwezi ŵake kuti: “Nkhufipa mtima yayi na umo mulandu wane wenderenge. Chiuta wachitengepo kanthu pa icho wazomerezga kuti chichitike, nakuti wovwiri wake wizenge panyengo yake. Nilutilirenge kuteŵetera Yehova kulikose uko ningaŵa.” Mubali Ruslan wakumanyaso fundo yakuti ŵabali na ŵadumbu pa charu chose chapasi ŵamulomberanga kuti walutilire kuzizipizga, ndipo iyo wakuti “ichi chanipembuzga chomene.”

Mu mazgu ghake ghaumaliro agho wakayowoya mu khoti pa December 14, 2020, Ruslan wakayowoya mwachikanga kuti: “Vyaka 2,000 ivyo vyajumpha, mwanalume munyake wa vyaka 33 wakeruzgika pa mulandu wakuti wakuwukira boma ndipo ŵakati wali na mulandu. Ndipouli, ukaboni ukulongora kuti wakeruzgika kuti wali na mulandu chifukwa chakuti wakaŵa paubwezi na Yehova Chiuta. Ivyo ŵakaboni ŵa mulandu uwu ŵakayowoyanga vikasuskananga, ndipo awo ŵakeruzganga ŵakatondeka kumanya ivyo wabuda, kweni nipera ŵakati wali na mulandu. Mwanalume uyu wakaŵa Yesu Khristu.

“Kufuma nyengo yira kufika mwahuno, ine naneso nili na vyaka 33, ndipo nimilira panthazi pa khoti na kupika mulandu wakuyanako waka wakuti nkhuwukira boma kweniso nkhutimbanizga mtende mu charu. . . . Para nakumbuka kuti nkhupika mulandu wakuwukira boma kweniso kutimbanizga mtende mu charu, nkhuzizwa chomene chifukwa cha nkhani yambura ukaboni wakupulikikwa iyi.”

Ruslan wakakanaso pakweru mulandu uwo ŵakamupanga wakuti wakambiskanga thinkho pakati pa ŵanthu awo ŵakupambana mtundu na chisopa. Iyo wakati: “Pa vifukwa vyakupambanapambana, nakulira pakati pa ŵanthu ŵamitundu yitatu: ŵa ku Russia, Azerbaijan na Ukraine. Nkhuŵatemwa chomene ŵanthu wose ŵa mitundu yitatu iyi. . . . Pa ŵabwezi ŵane paliso ŵanthu ŵanandi awo ŵakuyowoya Chingelezi ŵakufuma ku vyaru vya mu Africa, na awo ŵakuyowoya Chitchayinizi. . . . Nkhababikira ku Azerbaijan. Waliyose wakumanya makora umo ŵanthu ŵa ku Azerbaijan na Armenia ŵakutinkhirana, kweni mubwezi wane wapamtima ngwa ku Armenia, ndipo ndiyo wakaŵa kaboni pa ukwati wane. Ivyo nkhasambira ku chisopa chane ndivyo vikunovwira kuti niwonenge ŵanthu munthowa iyi, mwambura kupwelerako vya charu icho ŵakufuma, mitundu yawo, visopa, na kasangiro kawo. . . . Ntheura ntchakuzizika chomene kwa ine na awo ŵakunimanya kuti mukunipa mulandu uwu wakuti nkhuchiska ŵanthu kuti ŵajiwonenge ŵapachanya chifukwa cha mtundu wawo.”

Ntchakukhozga chomene kupulika kuti ŵabali na ŵadumbu ŵithu ku Russia ŵakugwiliskira ntchito nyengo iyo ŵakweruzgika mu khoti kuti ŵachitire ukaboni mwachikanga. Tikugomezga kuti Yehova watumbikenge mbuto za unenesko izo tikupanda apo tikuvikilira chipulikano chithu panthazi pa ŵamazaza.—Mateyu 10:18.