Pa May 20, 2021, Khoti la Leninskiy ku Saratov likati Mubali Rustam Seidkuliev wali na mulandu ndipo wakagwire jele vyaka viŵiri na hafu. Ŵakati ŵapeleka waka chigamuro, nyengo yeneyiyo ŵakaluta nayo kukamujalira.

Rustam Seidkuliev

• Chaka cha kubabikira: 1977 (ku Ashgabat, Turkmenistan)

• Mbiri yake: Wakalereka na amama ŵake. Wakamba kusambira Baibolo na Ŵakaboni ŵa Yehova mu 1993. Pati pajumpha vyaka viŵiri amama ŵake nawo ŵakamba kusambira Baibolo. Pambere wandabatizike, wakajalirikapo mu jele maulendo ghaŵiri ku Turkmenistan chifukwa cha kukana kunjira usilikari chifukwa cha njuŵi yake yakusambizgika Baibolo

  Mauchimi gha mu Baibolo agho ghakufiskika na fundo zakovwira izo zili mu Baibolo, vikamuchiska kuti wajipeleke na kubatizika mu 1998. Mbumba yakwake yikasamira ku Russia mu 2000 apo adada ŵake ŵamusangapo ŵakatumizgika ku charu chinyake chifukwa cha kuŵa Kaboni wa Yehova

  Wagwirapo ntchito ya kunozga matelefoni na ntchito za vyakuzenga. Wakakumana na muwoli wake, Yuliya mu 2001. Mbumba yawo yikutemwa maseŵera ghanyake ghakuchemeka bowling, kurya chakurya kuwaro kwa nyumba, na kuseŵera table tennis. Kufuma mu September 2019, ndiwo ŵakupwelelera ŵapapi ŵa Rustam

Mu March 2019, wa Federal Security Service (FSB) wakiza ku nyumba ya Mubali Rustam Seidkuliev na muwoli wake Yuliya. Munthu uyu wakaŵajanda kunthazi na galimoto yake, ndipo wakaŵafumba mafumbo pamanyuma na kuŵaphalira kuti ŵalute ku ofesi ya ŵa FSB kuti ŵakaŵafumbeso vinyake.

Pa February 15, 2020, ŵamazaza ŵakakaka Rustam na Yuliya apo ŵakaŵa ku msika. Rustam wakajalirika. Kufuma apo, khoti likadumura kuti wakakhale pa jele la panyumba. Pakwamba, ŵakaluta nayo ku malo ghanyake uko ŵakamusunga kwa myezi yiŵiri, ndipo pa nyengo iyi wakazomerezgekanga yayi kuwonana na muwoli wake. Apo ŵakamusamuskira pa nyumba yake, ŵakamukanizga kugwiliskira ntchito Intaneti panji nthowa yinyake yiliyose ya kuyowoyeskerana na munthu uyo wakuleka kukhala pa nyumba pake. Nyengo yakukhalira pa jele la panyumba iyi ŵakasazgirako maulendo 7. Rustam wakakhala mazuŵa 217 pa jele la panyumba.

Rustam wakasangana na masuzgo ghakupambanapambana apo wakaŵa pa jele la panyumba. Nyengo zinyake wakazomerezgekanga kwenda kufumapo pa nyumba kufuma 9 koloko mulenji kufika 11 koloko mulenji. Nyengo zinyakeso vinthu vikasinthanga mwakuti wakazomerezgekanga yayi nanga nkhufuma pawaro kuti wakapwelelere pa luŵaza panji kunozga mtenje wa nyumba yake. Iyo wakulongosora ivyo wakachita kuti walutilire kuwona vinthu mwakwenelera: “Apo nkhaŵa pa jele la panyumba, nkhaŵa na m’pata unandi wakuti nilombe na kughanaghanirapo vinthu vyauzimu. Nakuti, chifukwa chakuti nkhaŵanga wakutangwanika zuŵa lose, vikanovwira kuti nileke kusuzgika chomene maghanoghano. Nkhamanyanga kuti Ŵakhristu ŵanyane ŵanyake ŵali mu jele ndipo ŵakujumpha mu nyengo zakusuzga chomene kuluska izo ine nkhajumphangamo.”

Rustam wakusangaso nkhongono para wakughanaghanira ivyo vikamuchitikira kumasinda. Para wakukumbuka nyengo iyo wakaŵa mu jele ku Turkmenistan, iyo wakulongosora kuti: “Yehova wakanovwira mu vinandi kumasinda uku, chomenechomene apo nkhaŵa mu jele. Ivyo vikachitika vyanovwira kuti nithembenge chomene Yehova na kulutilira kuŵa na mtende wa mu mtima.”

Rustam wakulutilira kuchita ivyo wangafiska pa kumuteŵetera Yehova. Iyo wakuti : “Tingakhalanga yayi ku maungano panji kusulako waka ndondomeko ya kuchitira vinthu vyauzimu. Ndipo tingazomerezganga yayi kuti vinthu vinyake vititimbanizge kugwiliskira ntchito kanyengo kachoko ako kakhala pa kuchitira ukaboni na kukhozga Ŵakhristu ŵanyithu. Naŵikapo mtima kulutilira kuteŵetera Yehova na kuchita chilichose icho ningafiska, kweniso kuluta kulikose uko iyo wakhumba kuti niteŵetere, chifukwa kwakhala kanyengo kachoko chomene.”

Tikugomezga kuti Yehova walutilirenge kuŵapa ŵabali na ŵadumbu ŵithu ŵakugomezgeka ku Russia ‘chinthu chiwemi chilichose kuti ŵachite khumbo lake.’—Ŵahebere 13:21.