Pa December 21, 2020, Khoti la Leninskiy ilo lili ku Rostov-on-Don likati Mubali Semyon Baybak wali na mulandu ndipo likeruzga kuti waleke kusangikaso na mulandu unyake kwa vyaka vitatu na hafu. Pasono Mubali withu wamujalirika mu jele yayi.

Mu mazgu ghake ghaumaliro Mubali Semyon wakakora mazgu gha munthu munyake wakumanyikwa uyo wakuwona vya wanangwa wa ŵanthu ku Russia, uyo wakati: “Nangauli Ŵakaboni ŵa Yehova ŵakutambuzgika kweni ŵakumwemwetera.” Mubali Semyon wakayowoya mwakusimikizga kuti: “Uwu mbunenesko. Nkhumutinkhani yayi panji kumukwiyirani.” Kufuma apo wakaŵazga 2 Ŵakorinte 4:8, 9, wakati lemba ili likuyowoya vya iyo pamoza na Ŵakaboni ŵanyake ku Russia: “Tikufyenyeka chomene munthowa yiliyose, kweni tikutondeka kutukuluka yayi. Tikuhangayika, kweni tikusoŵerathu chakuchita yayi.Tikutambuzgika, kweni tikujowoleka waka yayi. Tikuponyeka pasi, kweni tikuparanyika yayi.”