Pa November 24, 2020, Khoti la mu Msumba wa Petropavlovsk-Kamchatskiy ku Chigaŵa cha Kamchatka likati Mubali Sergey Ledenyov wali na mulandu. Ndipo wakeruzgika kuti wakhale vyaka viŵiri kwambura kusangikaso na mulandu unyake kweniso ŵamuwonelerengepo kwa vyaka vitatu usange wali na nkharo yiwemi. Pasono mubali withu uyu ŵamumujalira mu jele yayi.

Pa zuŵa laumaliro la kutegherezgera mulandu uwu, Sergey wakalongosora mwachikanga ivyo chikung’anamura kuŵa yumoza wa Ŵakaboni wa Yehova. Iyo wakati: “Yehova ni zina la ŵanthu, wupu, panji chipulikano yayi. Yehova ni zina leneko la Chiuta. Mu Baibolo, mu buku la ntchimi Yesaya, Yehova wakuŵachema ŵateŵeti ŵake ŵakugomezgeka kuti ‘ŵakaboni ŵane.’ Pa mazgu agha ndipo pali kufuma zina ili lakuti, ‘Ŵakaboni ŵa Yehova’ ndipo tikamba kumanyikwa na zina ili kufuma pa ungano uwo ukachitika mu 1931. Zina ili likulongora kuti tili na ntchito yakuchitira ukaboni Chiuta, icho chikung’anamura kuphalirako ŵanji vya iyo, pakuŵa Mlengi, Mponoski, na Muwusi wa chilengiwa chose. Tikuphalirakoso ŵanji ivyo wakukhumba kuchitira ŵanthu. Nakuti ine pamoza na Ŵakaboni ŵanyane tikuwona kuti uwu ni mwaŵi wapadera chomene.”—Yesaya 43:10.

Sergey wakaphalira khoti na mtima wose kuti: “Palije chifukwa cha kukhozgekera soni, nga ni para kuti napalamura mulandu. Nili na njuŵi yituŵa kwa Chiuta na kwa ŵanthu wuwo.”