Pa December 16, 2020, Khoti la Leninskiy ku Novosibirsk likadumura kuti Mubali Yuriy Savelyev wakagwire jele vyaka 6. Mubali withu wakutemweka, Yuriy, wakulutilira kuŵa wakukhora kweniso wachikanga chifukwa cha kusambira na kupulikiska uchimi wa mu Baibolo.

Mu mazgu ghake ghaumaliro agho wakayowoya apo wakeruzgikanga mu khoti pa December 9, Yuriy wakasangirapo mwaŵi wakuchitira ukaboni mwachikanga. Iyo wakayowoya pa maso pa wose awo ŵakaŵapo kuti: “Uchimi uwo Yesu Khristu wakayowoyerathu ukufiskika sono nthena, ndipo namwe mukuwona na maso ghinu. Uchimi uwu uli mu Malemba Ghakupatulika, Baibolo, pa Mariko 13:9, apo pakuti: ‘Kweni imwe, muchenjere. Ŵanthu ŵazamumupelekani ku makhoti, ndipo muzamutimbika mu masunagoge na kwimikika panthazi pa ŵakazembe na mathemba chifukwa cha ine, kuti uŵe ukaboni kwa iwo.’”