Pa January 21, 2021, Khoti la Obluchenskiy ilo lili ku chigaŵa cha Jewish Autonomous, likati Mudumbu Anastasiya Sycheva wali na mulandu. Wakapika chilango chakuti wangasangikangaso na mulandu unyake yayi kwa vyaka viŵiri. Pasono mudumbu uyu, ŵamumujalira mu jele yayi.

Anastasiya Sycheva

• Chaka chakubabikira: 1977 (ku Teploozyorsk, ku chigaŵa cha Jewish Autonomous)

• Mbiri yake: Mu banja la kwawo ŵakaŵamo ŵana ŵankhondi kweni ŵaŵiri ŵali kufwa. Iyo wakasambira sukulu ya unesi, ndipo wali na digiri. Pakwamba wakagwiranga ntchito yakovwira ŵanthu awo ŵali na suzgo la mino, ndipo pamanyuma wakamba kugwira ntchito yakovwira ŵanthu ŵakusuzgika maghanoghano. Mukuru wake uyo wakaŵa na ŵana ŵachoko ŵaŵiri wakati wafwa, ndiyo wakamba kupwelelera ŵana. Kweniso ndiyo wakapweleleranga amama ŵake awo ŵakalwara kwa nyengo yitali m’paka apo ŵakafwira

  Apo iyo wakaŵa muwukirano, wakaghanaghanirapo chomene chifukwa icho taŵanthu tikukhalira umoyo ufupi. Ivi vikamupangiska kuti wambe kusambira Baibolo. Ndipo mu Baibolo wakasanga mazgoro ghakukhorweska. Ntheura wakabatizika nga yumoza wa Ŵakaboni ŵa Yehova mu 1994

Mu October 2019, ŵalara ŵa boma la Russia ŵakati Mudumbu Anastasiya njumoza mwa ŵanthu awo “ŵakuchita vinthu mwakutalulira.” Pa September 25, 2019, ku Birobidzhan, mu charu cha Russia, ŵapolisi ŵakufufuza milandu ŵa Federal Security Service (FSB), ŵakamba kumuzenga mulandu Mudumbu Anastasiya. Mudumbu uyu ŵakuti wali na mulandu chifukwa cha kuwungana na Ŵakaboni ŵa Yehova na kuphalirako ŵanyake ivyo wakugomezga.

Apo ŵakategherezganga mulandu wake, loya wakwimira boma wakawoneska vidiyo iyo ŵakajambura Mudumbu Anastasiya wakudumbiskana na munthu munyake kweniso maungano agho wakaluta. Loya wa boma wakati ivyo ŵakajambura vyakukhaskana na mudumbu withu mbukaboni wakuti “wakuchita vinthu mwakutalulira.” Kweni Mudumbu Anastasiya wakasangirapo mwaŵi wakupharazgira awo ŵakaŵa mu khoti pakugwiliskira ntchito vinthu ivyo ŵakatenge mbukaboni. Iyo wakaŵalongosolera kuti pa maungano gha Ŵakabono ŵa Yehova, ŵanthu ŵakusambira umo ŵangaŵira ŵachiwuravi, ŵakugowokera, ŵakuzikira, kweniso na mikhaliro yinyake yinandi.

Apo wakayowoyanga mazgu ghaumaliro pa mulandu wake, Mudumbu Anastasiya wakalongosora umo Baibolo lamovwilira kusintha vinthu vinyake pa umoyo wake. Iyo wakati: “Mwahuno nkhweruzgika chifukwa cha chipulikano chane, kweniso kuchita ivyo nkhusambira ku chisopa chane, nga kuŵerenga Baibolo, kuwungana pamoza na ŵabwezi ŵane kuti tidumbiskane Malemba Ghatuŵa, kwimba sumu izo zikulumba Yehova, na kulomba kwa iyo.

“Ningaleka yayi kupulikira dango ilo lili mu kalata yakuluta ku Ŵahebere ndipo lili mu chaputala 10 vesi 24 na 25, mazgu ghake ghakuti: ‘Ndipo tiyeni tighanaghaniranenge na kuchiskana kuti titemwanenge na kuchita milimo yiwemi. Tingalekanga yayi kuwungana pamoza nga umo ŵakuchitira ŵanyake, kweni tikhwimiskanenge, tichitenge vyose ivi chomene apo tikuwona zuŵa likuneng’enera.’ Usange Chiuta Wapachanya Nkhanira, Yehova, wakutichiska kuti tiwunganenge pamoza na ŵabwezi ŵithu, Ŵakhristu ŵanyithu kuti tiŵerengenge Baibolo, kuti tikhozganenge na kulongorana lusungu, ntheura ndine njani ine kuti nileke kumupulikira. Ine nkhumutemwa chomene Chiuta, nkhuumuchindika kweniso nkhumusopa.”

Tili ŵakukondwa chomene na umo Mudumbu withu Anastasiya wakavikililira chipulikano chake mwachikanga, kweniso kulongora pakweru kuti palije munthu wangamusunkhunya pa ivyo wakugomezga. Tikulomba kuti mphanyi mudumbu withu wakulutilira kuŵa wakukondwa kweniso kulutilira kuzizipizga apo wachali kungasanga na viyezgo.—Yakobe 1:2, 3.