Pa September 3, 2020, khoti la ku Novozybkov ilo lili mu chigaŵa cha Bryansk likati Mubali Vladimir Khokhlov, na Eduard Zhinzhikov kweniso mudumbu Tatyana Shamsheva na Olga Silaeva, ŵali na mulandu. Ndipo likaŵapa chilango chakuti ŵagwire jele chaka chimoza, ŵanyake chaka na myezi yitatu. Ndipouli, pasono ŵaŵafumiska chifukwa chakuti nyengo iyo ŵaŵasungiranga mu jele yakwaniska kale vyaka ivyo ŵangupika.

Vladimir Khokhlov

• Chaka cha kubabikira: 1977 (Novozybkov, ku Chigaŵa cha Bryansk)

• Mbiri yake: Wakugwira ntchito ya umakanika. Pambere wandaŵe Kaboni wa Yehova wakaŵa msilikari. Wakutemwa bola, kuŵerenga, kuŵeja somba, na kulizga gitara

• Mubwezi wake wakamuchiska kuti walimanye makora Baibolo. Wakatorana na Olga mu 2007. Ŵali na mwana msungwana zina lake, Anastasia. Wose ŵakuteŵetera Yehova

Tatyana Shamsheva

• Chaka cha kubabikira: 1977 (Cherepovets, ku Chigaŵa cha Vologda)

• Mbiri yake: Nkhwantha ya vyachuma. Kwa vyaka vinandi wagwira ntchito ya kusambizga ŵanthu vyachuma, vyamalango, na vyandalama. Wakabatizika mu 1995. Wakutemwa kovwira ŵanthu kuti ŵamanye fundo zakovwira za mu Baibolo

Olga Silaeva

• Chaka cha kubabikira: 1988 (Davydovo, ku Chigaŵa cha Moscow)

• Mbiri yake: Ndiyo ngwa umaliro kubabika mu banja la ŵana ŵatatu. Wakasambira pa koleji yinyake ndipo wali na digiri ya kuwona vya umo mphepo zakuthukira zikwendera. Wakutemwa vyakusonasona. Wakutemwaso kuŵerenga na kuseŵera volleyball. Wakamba kusambira Baibolo na kuwona fundo zake kuti ni zakovwira chifukwa cha chiyelezgero chiwemi cha amama ŵake

Eduard Zhinzhikov

• Chaka cha kubabikira: 1971 (Zadnya, ku Chigaŵa cha Bryansk)

• Mbiri yake: Wagwirapo ntchito ya kotchelera visulo na kupwelelera malo, ndipo wakaŵapo mpolisi. Wakaŵapo mu bandi yinyake ya sumu. Wakatorana na mwanakazi uyo nayo wakaŵa mu bandi yeneyiyi, zina lake Tatyana, mu 1993. Wakutemwa kulemba mapowemu na kulizga gitara

• Kuumaliro kwa vyaka vya mu ma 1990, wakamba kusambira Baibolo, ndipo wakasanga mazgoro gha mafumbo ghanandi agho wakaŵa nagho. Mazgoro agha ghakamovwira kuti wasinthe nkharo ziheni izo wakaŵa nazo na kwamba kukhala makora na banja lake. Ivi vikamukhorweska Tatyana. Pamanyuma nayo wakazgoka Kaboni wa Yehova

Pa June 11, 2019, ŵamazaza ŵakasecha nyumba 22 za Ŵakaboni ŵa Yehova mu Chigaŵa cha Bryansk ku Russia. Mudumbu Tatyana Shamsheva na Olga Silaeva ŵakaŵakaka. Waliyose wakakhala mazuŵa 245 mu jele umo ŵakaŵasunganga. Ŵakaŵafumiska mu May 2020, ndipo ŵakaluta ku nyumba zawo kulindilira kuti mulandu wawo weruzgike.

Pa October 16, 2019, ŵamazaza ŵakamba kumupa mulandu Mubali Vladimir Khokhlov na Eduard Zhinzhikov. Paumaliro mulandu wawo ŵakawusazga na mulandu wa Mudumbu Shamsheva na Silaeva. Pati pajumpha mazuŵa 7, ŵakati ŵabali aŵa ŵaŵasunge mu jele, ndipo ŵachali mwenemumu m’paka sono.

Ŵadumbu aŵa ŵakachezga nawo apo ŵakajamburanga Lipoti Lakufuma ku Wupu Wakulongozga la 2020 #5. Mudumbu Silaeva wakati myezi 8 iyo ŵakamusunga mu jele, wakajiwonera yekha kuti “nanga munthu wangakumana na masuzgo wuli, Yehova wakumovwira na mzimu wake utuŵa kuti watonde chiyezgo cha mtundu uliwose.” Mudumbu Shamsheva wakasimikizga kuti: “Nyengo zose Yehova wakuŵa nase pafupi, wakutikhozga, wakutipa nkhongono, kweniso wakutovwira.”

Tikugomezga kuti Yehova walutilirenge kovwira ŵabali na ŵadumbu ŵithu ku Russia, awo ŵangajalirika mu jele panji awo ŵali kale mu jele, kuti ŵalutilire kuzizipizga masuzgo agho ŵakusangana nagho na chimwemwe kweniso mtende.—1 Ŵakorinte 10:13.