Pa October 21, 2020, * Khoti la Pervomayskiy ilo lili mu Msumba wa Omsk lizamupeleka chigamuro chake pa mulandu wa Mubali Sergey Polyakov na muwoli wake Anastasia, pamoza na ŵadumbu ŵaŵiri Gaukhar Bektemirova na Dinara Dyusekeyeva. Wakwimira boma pa milandu wapempha khoti kuti leruzge kuti Mubali Polyakov wakagwire jele vyaka 6 na hafu. Apo ŵadumbu ŵatatu aŵa ŵangazakapika chilango chakuti ŵaleke kusangikaso na mulandu unyake kwa vyaka viŵiri.

Sergey Polyakov

• Chaka cha kubabikira: 1972 (Chigaŵa cha Murmansk)

• Mbiri yake: Wakasambira vya sayansi pa koleji yinyake. Wakatorana na Anastasia mu 2003

Anastasia Polyakova

• Chaka cha kubabikira: 1984 (Chigaŵa cha Murmansk)

• Mbiri yake: Wakasambira vya malango pa koleji yinyake. Iyo na mfumu wake Sergey, ŵakutemwa kusambira viyowoyero vinyake nga, Chitchayinizi, Chikazakh, Chiyowoyero cha Mawoko cha ku Russia, na Chiserbian

Gaukhar Bektemirova

• Chaka cha kubabikira: 1976 (Uryl, Kazakhstan)

• Mbiri yake: Mu banja lakwake ŵalimo ŵana 6 ndipo iyo ngwaumaliro. Wakakulira ku chigaŵa cha mapiri ku Kazakhstan ndipo wakutemwa chilengiwa. Kwa vyaka vinandi wakajifumbanga chifukwa icho tiliri na umoyo. Paumaliro wakasanga mazgoro ghakukhozga kweniso ghakukhorweska kufuma mu Baibolo. Chifukwa chakuti wakuŵikapo mtima kusambira Mazgu gha Chiuta, vyamovwira kuti waŵe na nkhongono, kweniso kuti walutilire kuzizipizga apo ŵakumusunga mu jele kwambura chifukwa chambura kupulikikwa

Dinara Dyusekeyeva

• Chaka cha kubabikira: 1982 (Leningradskove, Kazakhstan)

• Mbiri yake: Wakamba kujifumba chifukwa icho taŵanthu tiliri na umoyo kwamba waka apo wakaŵa muchoko. Wakamba kusambira Baibolo apo wakaŵa na vyaka 17. Wakazirwiskanga chomene fundo izo wakasambira mu Baibolo, ndipo wakakondwa chomene kumanya zina la Mulembi wa Baibolo, uyo ni Yehova. Wakutemwa basketball, volleyball, kuchimbira na kwendeska njinga

Apo Mubali Polyakov na muwoli wake, Anastasia, ŵakaŵa kuti ŵali mu tulo pa usiku wa pa July 4, 2018, ŵapolisi ŵakaswa chijaro cha nyumba yawo na kunjira. Ŵapolisi awo ŵakavwara vinthu vya kujara kumaso ŵakamutimba mwankhaza Mubali Polyakov. Paumaliro ŵapolisi aŵa ŵakalikaka banja ili na kulituma ku malo agho ŵakusungirako ŵanthu awo mulandu wawo underuzgike. Aka kakaŵa kakwamba kuti mfumu na muwoli, wose ŵajalirike mu jele, kufuma waka mu 2017 apo Khoti Likuru likadumura kuti ntchito ya Ŵakaboni ŵa Yehova njakukanizgika. Banja ili ŵakalisunga mu jele myezi 5, kweni waliyose ŵakamuŵika kwayekha. Kufuma apo wose ŵakaŵatuma pa jele la pa nyumba kwa myezi yitatu.

Mu 2019, ŵamazaza ŵakasechaso mwakuchichizga nyumba za Ŵakaboni ŵa Yehova ku Chigaŵa cha Omsk. Ivi vikapangiska kuti Mudumbu Bektemirova na Dyusekeyeva ŵakakike. Mulandu wawo ŵakawusazga na mulandu wa banja la Mubali Polyakov. Ŵakamba kutegherezga mulandu wa wose ŵanayi pa April 1, 2020.

Tikugomezga kuti Yehova waŵapenge nkhongono ŵateŵeti ŵake kuti ŵalutilire kuzizipizga vinthu vyambura urunji ivyo vikuŵachitikira.—Ŵaefeso 3:20.