Khoti la Apilu ku Russia Lakhozgera Cheruzgo Icho Chikapelekeka Pakwamba Chakuti Mubali Zalipayev Walije Mulandu

Pa January 25, 2021, Khoti Likuru la ku Kabardino-Balkarian Republic likakana apilu iyo wakachita wakwimira boma pa milandu pa cheruzgo icho chikapelekeka pa October 7, 2020, icho chikati Mubali Yuriy Zalipayev walije mulandu. Wakwimira boma pa milandu wangasankha kuchitaso apilu chigamuro chasono ichi. Ndipouli, chigamuro chakuti walije mulandu ichi chamba kugwira ntchito. Milandu yose iyo Yuriy wakapika yajarika. Pasono mubali uyu wali na wanangwa wakupempha kuti ŵamulipire chifukwa cha kumupusikizgira kuti wali na mulandu.

Yuriy wakagomezga mwa Yehova ndipo wakaŵa na chikanga mu khoti nangauli wakamanyanga kuti nyengo zinyake chigamuro chakuti walije mulandu chingasintha. Kwati kwakhala nyengo yichoko waka kuti khoti lipeleke chigamuro chake, Yuriy wakaphalira khoti mwachikanga kuti sonosono apa Chiuta wamazgenge uheni wose, kusazgapo nthambuzgo izo ŵakusangana nazo Ŵakaboni ŵa Yehova ku Russia. Iyo wakati: “Nanga ŵanganitambuzga mu nthowa wuli, kweni pali chinthu chimoza icho ŵakwenera kumanya. Palije icho ŵangachita kuti m’paka ŵanilekeske kuŵa na chipulikano mu ivyo Chiuta wali kulayizga kuti sonosono apa wamazgenge uheni wose pa charu. Nili na chigomezgo chose kuti layizgo lakuti paumaliro ŵanthu ŵa mitundu yose ŵazamumanya kuti wose mbamoza, nalo lifiskikenge sonosono apa. Nakuti palije icho chingaŵagaŵaniska. Pakuyowoya vya Chiuta, Baibolo likuti: ‘Wazamweruzga pakati pa mitundu na kunyoloskera vinthu ŵanthu ŵanandi. Ŵazamuskana malupanga ghawo kuŵa vyakulimira, mikondo yawo kuŵa vyakuphatilira makuni. Mtundu uzamuwuskira mtundu unyake lupanga chara, ndipo ŵazamusambiraso nkhondo chara.”—Yesaya 2:4.

“Nkhukayika yayi na pachoko kuti layizgo lakhala pachoko chomene kufiskika!”