NOVEMBER 5, 2021
RUSSIA

Kuchita Vinthu Vyauzimu Kwawovwira Mubali Aleksey Yershov Kuti Waleke Kugongowa

JULANI

Nyengo

Khoti la mu Msumba wa Severskiy sonosono apa lipelekenge chigamuro chake pa mulandu wa Mubali Aleksey Yershov. a Wakwimira boma pa milandu wali kupempha khoti kuti Mubali Yershov wakhale mu jele vyaka vinkhondi
June 22, 2021

Mulandu ukatumizgika ku Khoti la mu msumba wa Severskiy ku chigaŵa cha Tomsk
March 30, 2021

Ŵakati Mubali Aleksey wali na mulandu pakutolera pa ivyo ŵakawona mu mavidiyo agho munthu munyake wakajambura. Munthu uyu wakapusikizgira kuti wakukhumba kusambira Baibolo pafupifupi kujumpha chaka
July 14, 2020

Ŵa FSB (ŵapolisi ŵachisisi ŵa ku Russia) na ŵanthu ŵakufufuza vya milandu ŵakanjira mu nyumba ya Mubali Aleksey na kwamba kufufuza kwa maora 7. Ŵapolisi aŵa ŵakapoka makadi gha ku banki, makompyuta na mafoni, Baibolo, mapasipoti, kweniso Wi-Fi

Vyakukhwaskana na munthu uyu

Aleksey Yershov

Chaka cha kubabikira: 1953 ku Seversk (Chigaŵa cha Tomsk)

Mbiri yake: Adada ŵake ŵakafwa chaka icho iyo wakababikira. Wakalereka na amama ŵake. Wakaŵa injiniya kweniso wakasambizgapo mu masukulu yakusambizga maluso ghakupambanapambana

Wakatorana na Lyudmila mu 1976. Wali na ŵana ŵalara ŵaŵiri

Mubali Aleksey wakamba kusambira Baibolo wati waluta ku maungano gha Ŵakaboni ŵa Yehova agho mwana wake wa sukulu wakamuchemerako. Iyo wakanweka chomene na fundo za mu Baibolo izo wakapulika kweniso vinthu vyakukhwaskana na Ufumu wa Chiuta. Wakabatizika na kuŵa Kaboni wa Yehova mu 1994

Ivyo wakayowoya

Kasi ntchivichi chamovwirani kukhozga ubwezi winu na Yehova apo mukusangana na viyezgo ivi?

Kanandi ine na muwoli wane tikulombera lumoza. Nkhuwona kuti mphanyi nkhakwaniska yayi kuzizipizga viyezgo ivi kwambura wovwiri wa Yehova. Lekani nkhulutilira kusendelera chomene kwa Yehova mwakuchita sambiro la namwene kweniso kuŵerenga Baibolo zuŵa lililose. Mulenji uliwose, ine na muwoli wane tikuchitira lumoza lemba la zuŵa kweniso kulomba kwa Yehova.

Kasi mukuchita wuli kuti muleke kugongowa?

Kusambira panekha kukunovwira kuti nileke kugongowa. Nkhughanaghanirapo chomene pa viyelezgero vya ŵateŵeti wa Chiuta ŵakale ŵakugomezgeka. Mu Baibolo muli nkhani zinandi za ŵateŵeti ŵa Chiuta izo zikulongora kuzirwa kwa kuleka kufipa chomene mtima kweniso kugomezga chomene Yehova. Para nkhughanaghanirapo nkhani izi, zikunovwira kumanya ivyo vikawovwira ŵateŵeti ŵa Chiuta aŵa kuleka kufipa chomene mtima. Pa Milimo 5:29 pakuti: “Tikwenera kupulikira Chiuta nga muwusi m’malo mwa ŵanthu.” Apo Khoti Likuru la Sanihedirini likaphalira ŵapositole kuti ŵaleke kupharazga, ŵapositole ŵakachita wofi yayi. Kweniso apo wakaŵathyapura na maluswazu, wakawopaso yayi. Ŵapositole ŵakamanya kuti Yehova wakaŵa nawo ndipo wakakondwanga nawo.

Kuŵerenga Baibolo zuŵa lililose na lurombo vilutilirenge kukhozga kweniso kupembuzga ŵabali na ŵadumbu ŵithu ku Russia. Lemba la Salimo 9:9 likutisimikizgira kuti, “Yehova waŵenge chigongwe chakukhora ku ŵakuyuzgika, chigongwe chakukhora mu nyengo za suzgo.”

a Ni nyengo zose yayi apo deti ilo khoti lizamupelekera chigamuro chake likumanyikwirathu.