DECEMBER 14, 2023
RUSSIA

“Kugomezga Yehova Ntchinthu Chakuzirwa Chomene”

JULANI

Khoti la Samarskiy ilo lili ku Chigaŵa cha Samara lipelekenge cheruzgo chake sonosono apa pa mulandu wakukhwaskana na Mubali Aram Danielyan, Denis Kuzyanin, Sergey Polosenko, na Nikolay Vasiliyev. Wakwimira boma pa mulandu wandapemphe chilango icho ŵabali aŵa ŵangapika.

Vyakukhwaskana na ŵanthu aŵa

Aram Danielyan

Chaka cha kubabikira: 1990 (Armenia)

Mbiri yake: Banja lake likasamira ku Russia apo wakaŵa na myezi 6

Wakagwiranga ntchito ya kuzenga na kugura vinthu.

Ankhazi ŵake na amama ŵake ndiwo ŵakamusambizga Baibolo. Wakamba kutemwa Yehova wati wawona kuti malurombo ghake ghakuzgoreka. Mu 2011, wakabatizika na kuŵa yumoza wa Ŵakaboni ŵa Yehova

Wakatorana na Elina mu 2017. Ŵali na mwana mwanalume yumoza

Ivyo Wakayowoya

Kasi ntchivichi icho chikumovwirani kuti muleke kugongowa?

Nyengo zinyake nkhuŵa na chitima chifukwa cha ivyo vikunichitikira. Kweni para vyaŵa nthena, vikunikumbuska kuti nili kusankha kuŵa muteŵeti wa Yehova. Usange ningaleka kumusopa kuti nileke kutambuzgika, nkhumanya kuti vingazakanimalira makora yayi. Nkhukondwa kumanya kuti nkhuvwirapo pa kutuŵiska na kumanyiska zina la Yehova. Naŵikapo mtima kususka Satana kuti ningaleka yayi kuteŵetera Yehova nanga ningafwa.

Denis Kuzyanin

Chaka chakubabikira: 1984 (Norilsk, Chigaŵa cha Krasnoyarsk)

Mbiri yake: Wali na bizinesi yake

Denis na amama ŵake ŵakamba kusambira Baibolo na Ŵakaboni ŵa Yehova apo iyo wakaŵa na vyaka 10. Wakabatizika mu 2001

Wakatorana na Yelena mu 2012. Ŵali na mwana yumoza msungwana

Ivyo wakayowoya

Kasi ni nkhani wuli ya mu Baibolo iyo yamovwirani kuti mulutilire kuŵa na maghanoghano ghakwenelera?

Buku la Yobu likunovwira chomene. Kwamba mu chipaturo 38, Yehova wakadumbiskana na Yobu za nkhongono zake zakulengera vinthu. Kughanaghanira ivyo Yehova wachita kale ndiposo ivyo wazamuchita kukunovwira kumanya ivyo ni vyakuzirwa chomene pa umoyo wane. Vikunikumbuska kuti chakuzirwa chomene nkhupulikira Yehova. Nkhumanya kuti wanovwirenge nanga ningaŵa kuti nakumana na masuzgo wuli chikuru nkhuchita vinthu vyakumukondweska.

Sergey Polosenko

Chaka chakubabikira: 1968 (Uzbekistan)

Mbiri yake: Wakagwiranga ntchito yakulaŵilira ku Saluni

Wakatorana na Lydia mu 1993

Wakakulira mu mbumba ya Ŵakaboni ŵa Yehova ndipo wakabatizika mu 1982

Ivyo Wakayowoya

Kasi ubwezi winu na Yehova ukakhwaskika wuli apo mukaŵa mu jele kulindilira kuti mweruzgike?

Apo nkhaŵa mu jele kulindilira kuti neruzgike pakaŵavya chakuti ningachita kuti vinthu visinthe. Tikaŵa waka ine na Yehova. Nkhawona kuti Yehova wakanivikiliranga, kunovwira, kweniso kuluska vyose, wakaŵa mubwezi wane. Nkhamanya kuti wakaŵanga nane nyengo yose. Wamunthu ukujipulika kuŵa wakuvikilirika chifukwa chakuŵa paubwezi uwemi na Yehova. Apo vinthu vikulutilira kusintha, nkhulutilira kusambira vinandi vyakukhwaskana na Yehova na mikhaliro yake yiwemi. Nkhumuwonga chomene chifukwa cha ivi.

Nikolay Vasiliyev

Chaka chakubabikira: 1984 (Aisha, ku Tatarstan)

Mbiri yake: Wakagwiranga ntchito yakupanga mapulogiramu gha pa kompyuta

Wakagomezganga yayi kuti kuli Chiuta. Wati wasambira Baibolo, wakawona kuti visambizgo vyake ni vyakupulikikwa ndipo wakakhorwa kuti Chiuta waliko. Wakabatizika mu 2005

Ivyo Wakayowoya

Kasi ntchivichi chikamovwirani kuti mulutilire kugomezga Yehova?

Pambere ŵandanijalire mu jele la ŵanthu awo milandu yawo yinderuzgike, nkhawopanga chomene kukhala mu jele. Sono pakuti namanya umo vikuŵira mu jele na umo Yehova wakanikhozgera, wofi uwu uli kumara. Nangauli ntchakusuzga kumanya kuti mulandu uwu uzamutora nyengo yitali wuli ndiposo umo ŵazamudumulira, kweni nkhumanya kuti Yehova wali nane nyengo zose. Kugomezga Yehova ndiko kwanovwira kuŵa na mtende wa mu mtima na kugomezga kuti vinthu viŵenge makora.

Tikugomezga kuti Yehova walutilirenge kusanguluska wose awo ŵakusuzgika chifukwa cha chipulikano chawo apo ‘wakuŵakhozga kuti nyengo zose ŵachitenge na kuyowoya icho ntchiwemi.’—2 Ŵatesalonika 2:16, 17

Nyengo

December 14, 2021

Mubali Denis, Nikolay na Sergey ŵakaŵajulira mulandu
December 15, 2021

Ŵakasecha nyumba ya Mubali Denis, Nikolay, na Sergey. Kufuma apo wakakakika na kutumizgika ku jele la awo milandu yawo yinderuzgike
December 16, 2021

Denis, Nikolay, na Sergey ŵakatumizgika ku jele la awo milandu yawo yinderuzgike
January 6, 2022

Aram ŵakamujulira mulandu. Ŵakamukakira pa chiŵanja cha ndege
January 7, 2022

Aram wakaŵikika mu jele la ŵanthu awo milandu yawo yinderuzgike
December 12-14, 2022

Ŵabali wose ŵanayi ŵakaŵafumiska mu jele ndipo ŵakakanizgika kwenda kuluta ku malo ghanyake
June 16, 2023

Khoti likamba kutegherezga mulandu

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI