Khoti la Zelenogorsk ilo lili ku Chigaŵa cha Krasnoyarsk lipelekenge chigamuro chake sonosono apa pa mulandu wa Mubali Aleksandr Kabanov. Wakwimira boma pa milandu wapempha kuti mubali uyu wapike chilango chakugwira jele vyaka viŵiri na hafu.

1. December 26, 2019

   Wakakakika na kupika mulandu wakuti wakachitangako milimo ya gulu ilo likuchita vinthu vyakofya, nga nkhuŵazga Baibolo na kuphalirako ŵanji vyakukhwaskana na Yehova. Wakasungika dankha mu jele

2. December 27, 2019

   Wakafumiskika apo mweruzgi wakakana pempho la wakufufuza mulandu lakuti wasungike dankha mu jele

3. December 6, 2021

   Aleksandr wakayowoya mazgu ghake ghaumaliro mu khoti. M’malo mwakuti ŵadumure mulandu wake, mweruzgi wakati ŵambireso kumufufuza ndipo ivi vikapangiska kuti mulandu uwu utore nyengo yitali

4. March 25, 2022

   Khoti likambiraso kutegherezga mulandu

Ŵabali na ŵadumbu ŵithu ku Russia ntchiyelezgero chiwemi chomene pa nkhani ya chipulikano chifukwa ŵakuŵikapo mtima kulondezga mazgu gha pa Yesaya 12:2: “Wonani, Chiuta ntchiponosko chane. Nithembenge iyo ndipo niwopenge yayi. Pakuti Ya, Yehova ni nkhongono zane na chivikiliro chane.”