Pa February 18, 2021, a Khoti la Birobidzhan ilo lili ku Chigaŵa cha Jewish Autonomous lizamupeleka chigamuro chake pa mulandu wa Mudumbu Yuliya Kaganovich. Wakwimira boma pa milandu wachali wandapemphe chilango icho khoti likwenera kumupa mudumbu uyu.

Yuliya Kaganovich

• Chaka cha kubabikira: 1966 (Mikhaylovka, Chigaŵa cha Volgograd)

• Mbiri yake: Wakasambira vya uinjiniya. Apo wakaŵa muchoko, wakaluta ku sukulu yinyake yakusambizgirako kuvina, wakamalizga sukulu ya vya sumu, wakaŵapo mu gulu la ŵanthu awo ŵakwimba ving’wenyeng’wenye kweniso wakimbapo kwaya. Mfumu wake Aleksandr ni Kaboni wa Yehova yayi, kweni wakumukhozgera Yuliya ndipo wakugomezga kuti mulandu uwo wakupika ukulongolerathu kuti ŵakumuchitira vinthu vyambura urunji

  Ŵachibali ŵake ŵanyake ŵati ŵafwa, wakamba kughanaghanirapo chifukwa icho tiliri na umoyo. Mazgoro gha mu Baibolo ghakamovwira kuti waŵe na mtende wa mu mtima na chigomezgo. Wakabatizika mu 1998. Fundo za mu Baibolo zamovwira kuti nthengwa yake yiŵe yakukhora, waŵe pa ubwezi uwemi na ŵanji kweniso kuti walere makora mwana wake munyamata, Artur, uyo nayo ni Kaboni wa Yehova

  Mudumbu uyu wakusuzgika kale na ulwari ndipo mulandu uwu ukupangiska waka kuti vinthu vihenipirethu

Mudumbu Yuliya Kaganovich wakukumbuka kuti: “Nkhati napulika kugogoda pa chijaro mulenjilenji, nyengo yeneyiyo nkhamanya kuti wakwenera kuŵa njani. Mtima wane ukamba kuchimbira, ndipo nkhawerezganga waka mazgu ghamoza na ghamoza ghakuti: ‘Yehova, chonde novwirani. Yehova, chonde novwirani.’”

Mudumbu withu wa vyaka 53 wakamba kutambuzgika chifukwa cha ivyo wakugomezga pa October 10, 2019, mu msumba wa Birobidzhan ku Russia. Zuŵa ilo ŵa Russian Federal Security Service (FSB) ŵakasechera nyumba ya Yuliya, ndilo ŵakasecheraso nyumba zakujumpha 20 za ŵabali na ŵadumbu ŵithu ŵa mu chigaŵa chenechichi.

Ivyo vikachitika vikaŵa vyakumara mahara, kweni Yuliya pamoza na Ŵakaboni ŵanyake ŵakalutilira kuŵa ŵakukhora chifukwa ŵakanozgekerathu.

Yuliya wakuti: “Kanandi ku maungano tikakumbuskikanga kuti ŵamazaza ŵangiza kuzakasecha nyumba zithu, ntheura tikwenera kunozgekerathu. Pakuti nkhamanyanga kuti vingachitika nyengo yiliyose, nkhanozgekerathu mu mtima umo ningazakachitira kweniso ivyo ningazakayowoya.” Iyo wakulutizga kuti: “Nkhawamo kuti ntchakuzirwa chomene kumanyirathu ivyo ningazakachita. Ivi vikanovwira kuti nighanaghane luŵiro ivyo ningachita, m’malo mwa kuhangayika na wofi, m’paka kusoŵa na chakuchita.”

Nakuti vikachitika nadi, mwaluŵiro ŵamazaza ŵa Russia ŵakajura mulandu ŵati ŵasecha nyumba za ŵabali izi. Yuliya na ŵanyake ŵakapika mulandu wa kuchita vinthu mwakutalulira.

Pa March 3, 2020, ŵamazaza ŵakaluta na mulandu uwu ku Khoti la Birobidzhan. Mulandu uwu ŵakawuyimiska dankha kwa myezi 5 chifukwa cha muliri wa COVID-19. Yuliya wakalutaso ku khoti pa October 22, 2020.

Yuliya wakuti: “Mu kuyowoya kunyake, ningati nkhakhumba yayi kuti ivi vinichitikire. Kweni ku chigaŵa chinyake, nkhakondwa chomene kukhozgera muwuso wa Yehova.

Iyo wakuti: “Lemba la Yesaya 41:10 ndilo nkhakhumbikwiranga nadi pa nyengo iyi. Nkhapulinta vesi ili na kulibatika mu nyumba mwane mwakuti nyengo zose nikumbukenge mazgu ghakukhozga agho Yehova Chiuta wakuniphalira. Najiwonera nekha umo Yehova wanikhozgera na kunipa nkhongono.”

Yuliya waŵikapo mtima chomene kusunga pa mtima mavesi ghanandi agho ghakumovwira kuti mtima wake uŵe m’malo, waŵe na chikanga, kweniso wachimwemwe nangauli wakusangana na masuzgo ghose agha.

Mphanyi tose tachita vinthu mwavinjeru na kunozgekerathu ivyo tingazakayowoya para tikutambuzgika, kweniso kukhozga chipulikano chithu mwa Yehova mwakuti tiŵe ŵakunozgeka kuzakatonda viyezgo ivyo vikwiza munthazi. Tili na chigomezgo chose kuti “Yehova waŵanorenge yayi kanthu kawemi awo ŵakwenda mwakunyoloka.”—Salimo 84:11.