JANUARY 4, 2022
RUSSIA

Kunozgekera Kweniso Chigomezgo Vyawovwira Chomene Mubali Pyotr Krupnov na Muwoli Wake Maya

JULANI

Nyengo

December 30, 2021

Khoti la Nikolskiy ku Chigaŵa cha Penza likati Mubali Pyotr Krupnov na muwoli wake Maya, ŵali na mulandu ndipo ŵaleke kusangikaso na mulandu kwa vyaka vitatu. Ulendo uwu ŵamuŵajalira mu jele yayi
October 25, 2021

Khoti likamba kutegherezga mulandu
October 12, 2021

Pyotr na Maya ŵakaŵikika mu gulu la vigeŵenga kweniso la ŵanthu awo ŵakuchita vinthu vyakofya chifukwa waka cha kudumbiskana na ŵanyawo vyakukhwaskana na chisopa
September 15, 2021

Ŵamazaza ŵakamujulira mulandu Maya. Pamanyuma Pyotr nayo ŵakamupa mulandu wenewuwu
October 11, 2020

Ŵamazaza ŵakasecha nyumba za mbumba za Ŵakaboni ŵa Yehova zinayi ku Nikolsk, kusazgapo nyumba ya Krupnov

Vyakukhwaskana na ŵanthu aŵa

Pyotr Krupnov

Chaka cha kubabikira: 1963

Mbiri yake: Wakugwira ntchito ya upulambara. Wakamba kusambira Baibolo na Ŵakaboni ŵa Yehova mu 1996. Wati waŵazga mabuku ghithu kweniso kuwona umo wakachitiranga vinthu munthu uyo wakamusambizganga Baibolo, wakakhorwa kuti wasanga unenesko. Wakabatizika mu 2002

Wakakumana na Maya ku maungano gha mpingo. Ŵakatorana mu 2008

Ivyo Wakayowoya

Kasi mungakumbuka nyengo yinyake apo mukuwona kuti Yehova wakamovwirani?

[Nkhukumbuka nyengo yinyake apo] nkhalomba Yehova kuti wanovwire na mzimu utuŵa ndipo nkhakumbukira lemba la Yohane 10:28, ilo likuti: “Palije uyo wazamuzikwachapura mu woko lane.” Para naghanaghanirapo pa fundo iyi nkhongono zikawelerangamo ndipo nkhaŵanga wakukondwa. Nkhajipulikanga kuti Adada ŵane ŵakuchanya ŵali pafupi nane. Ivi vikanovwiranga kuti mtima uŵe m’malo kweniso niŵe na chikanga.

Ntchivichi chikumovwirani kuti muzizipizgenge?

Nyengo zose nkhukumbuka kuti nanga viyezgo ivyo tikukumana navyo vingaŵa vikuru wuli, ni vichoko chomene pakuyaniska na [mwaŵi wa] kuteŵetera Yehova na kuzakakhala kwamuyirayira mu paradiso. Chifukwa chakuti nkhutemwa Chiuta kweniso ŵanthu vikunovwira kuti niŵe na nkhongono zakuzizipizgira viyezgo ivyo nkhusangana navyo.

Maya Krupnova

Chaka cha kubabikira: 1957 (Atasu, Kazakhstan)

Mbiri yake: Wakagwiranga ntchito yakuphika. Pasono wali kupumura ndipo wakutemwa kupwelelera maluŵa

Wakapulika kakwamba vyakukhwaskana na Ŵakaboni ŵa Yehova kufuma kwa mwana wake msungwana. Wose ŵakabatizika mu 2001

Ivyo Wakayowoya

Kasi mukanozgekera wuli viyezgo ivi?

Nkhamba kunozgekera apo ŵabali na ŵadumbu ŵakamba kukakika [mu msumba wapafupi]. Nkhaŵazga mabuku gha mu Baibolo gha Esitere na Yeremiya. . . . Nyengo zose maso ghakaŵanga waka pa webusayiti yithu kuti niwone malipoti agho ŵaŵikapo kweniso nkhaŵikapo mtima kusunga pa mtima sumu zithu. Nkhanozga kachikwama ka pangozi kweniso chikwama icho ningazakaluta nacho ku jele. . . . Nkhalomba kwa Yehova kuti wanipe vinjeru na chikanga mwakuti nizakazizipizge mu nthowa yiwemi viyezgo ivyo ningakumana navyo.

Kasi ŵabali na ŵadumbu ŵinu ŵamovwirani wuli?

Ningati waka waliyose wanikhozga chomene, chomenechomene para nkhukhumbikwira wovwiri. Pa nyengo yinyake apo nkhasuzgikanga maghanoghano, ŵabali na ŵadumbu ŵakaniyimbiranga foni na kunilembera makalata, kunisimikizgira kuti ŵakunitemwa. . . .Nkhamanyanga kuti nili na mbumba yikuru ya chitemwa. Kweni kwamba mu 2020, ndipo najiwonera nekha kuti nili nadi mu mbumba ya chitemwa.

Tikuwonga chomene chiyelezgero chiwemi cha Pyotr na Maya apo ŵakulutilira kukhora mu chigomezgo chawo kweniso kuthemba Yehova.—Ŵahebere 6:19.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI