SEPTEMBER 20, 2022
RUSSIA

Kuzizipizga Kukovwira Kuti Paŵe Viwemi Vinandi

JULANI

Khoti la Levoberezhniy ilo lili mu Msumba wa Voronezh lipelekenge chigamuro chake sonosono apa pa mulandu wa Mubali Aleksey Antyukhin, Sergey Baev, Yuriy Galka, Valeriy Gurskiy, Igor Popov, Vitaliy Nerush, Stepan Pankratov,, a Yevgeniy Sokolov, Mikhail Veselov, na Anatoliy Yagupov. Wakwimira boma pa milandu wachali wandapemphe chilango icho ŵangapika.

Nyengo

July 13, 2020

Ŵamazaza ŵakasecha nyumba zakujumpha 100 za Ŵakaboni ŵa Yehova ku Voronezh na vigaŵa vyapafupi. Ŵabali na ŵadumbu ŵakujumpha 40 ŵakaluta nawo kuti ŵakaŵafumbe mafumbo. Ŵabali 10 awo taŵazunura kukwambilira ŵakaŵasunga dankha
July 14-15, 2020

Ŵabali wose 10 ŵakaŵatuma ku jele la kusungirako ŵanthu awo mulandu wawo underuzgike
August 3 m’paka September 18, 2020

Mubali Baev, Pankratov, Popov, na Yagupov ŵakafumiskika mu jele na kutumika pa jele la panyumba
December 1-3, 2020

Mubali Antyukhin, Galka, Gurskiy, Nerush, Sokolov, na Veselov ŵakafumiskika mu jele. Mubali Baev, Pankratov, Popov na Yagupov ŵakafumiskika pa jele la panyumba
December 13, 2021

Khoti likamba kutegherezga mulandu wawo

Vyakukhwaskana na ŵanthu aŵa

Sergey Baev

Chaka cha kubabikira: 1973 (Almaty, Kazakhstan)

Mbiri yake: Wakagwiranga ntchito ku city yakunozga mu msewu na malo ghanyake ghakuchezgera

Wakabatizika mu 1994. Wakatorana na Olga mu 2003. Ŵali na mwana yumoza mwanakazi

Ivyo Wakayowoya

Ntchivichi chikamovwirani kuti muwonenge vinthu mwakwenelera apo mukaŵa mu jele?

Nkhalombanga kwa nyengo yitali ndipo nkhaghanaghanirangapo viyezgo ivyo Ŵakhristu ŵanyake ŵakukumana navyo. Nkhajiwonera nekha kufiskika kwa layizgo la Yehova ilo lili pa Ŵahebere 13:5, ndipo chigaŵa chinyake cha lemba ili chikuti: “Nikulekenge yayi napachoko nesi kukutaya munthowa yiliyose.” Nangauli yikaŵa nyengo yakusuzga chomene, ndipo vinthu vikaŵa makora yayi pa umoyo wane, kweni mtima ukaŵa m’malo ndipo nyengo yose iyo nkhasungikanga mu jele nkhaŵa na mtende wa mu mtima.

Yuriy Galka

Chaka cha kubabikira: 1975 (Marhanets, Ukraine)

Mbiri yake: Wakagwiranga ntchito ya kuŵikira matayilosi. Wakabatizika mu 1997. Wakatorana na Nadezhda mu 2009. Ŵali na mwana yumoza mwanakazi

Ivyo Wakayowoya

Ntchivichi chamovwirani kuti mulutilire kuthemba Yehova?

Apo nkhaŵa mu jele, chikaŵa chipusu yayi kuti nilutilire kuthemba Yehova. Nkhawona kuti ntchakuzirwa chomene kulutilira kulondezga ndondomeko ya kuchitira vinthu vyauzimu. Enya, nkhafiskanga kuzizipizga, kweni pekha para nkhuwona vinthu mwakwenelera. Para naleka waka kulondezga ndondomeko ya vinthu vyauzimu, nyengo yeneyiyo nkhambanga kukayika. Kuŵazga Baibolo nyengo zose kweniso makalata agho ŵabwezi na ŵachibali ŵakanilemberanga kukanovwira kuti nisange chakurya chauzimu icho nkhakhumbikwiranga. Ntheura nkhafiska kulutilira kuwona vinthu mwakwenelera ndipo nkhafuma mu jele uku nichali wakugomezgeka kwa Yehova.

Tikukhozgeka chomene kuwona viwemi ivyo vikuŵapo chifukwa cha kuzizipizga uko ŵabali na ŵadumbu ŵakulongora ku Russia apo ŵakulutilira kuthemba Yehova.—Yakobe 1:4.

a b Chithuzi cha Mubali Pankratov pakaŵavya.