SEPTEMBER 14, 2023
RUSSIA

Lurombo Lukaŵakhozga Chomene Ŵadumbu Ŵatatu

JULANI

Khoti la Zeya ilo lili ku Chigaŵa cha Amur sonosono apa lipelekenge chigamuro chake pa mulandu wa Mudumbu Margarita Moiseyenko, Galina Yatsik, na Yelena Yatsyk. Wakwimira boma pa milandu wachali wandapemphe chilango icho ŵadumbu aŵa ŵangapika.

Vyakukhwaskana na ŵanthu aŵa

Margarita Moiseyenko

Chaka cha kubabikira: 1978 (Krasnoyarsk, Chigaŵa cha Krasnoyarsk)

Mbiri yake: Wakugwira ntchito yakusona malaya. Wakatorana na Konstantin mu 1998. Pa July 14, 2021 Konstantin ŵakati wali na mulandu, ndipo wakaphalirika kuti wangasangikangaso na mulandu unyake yayi kwa vyaka 6

Wakamba kusambira Baibolo apo wakaŵa na vyaka 18 pamanyuma pakuti mubali wake wafwa. Wakabatizika na kuŵa yumoza wa Ŵakaboni ŵa Yehova mu 2001

Ivyo Wakayowoya

Kasi chikumovwirani ntchivichi kuti mulutilire kuzizipizga?

Nkhukumbuka lemba la Zintharika 21:31 ilo likayowoyeka pa ungano wa chigaŵa mu 2018 wa mutu wakuti “Khwimani Mtima.” Lemba ili likuti: “Hachi likunozgekera zuŵa la nkhondo, kweni Yehova ndiyo wakuponoska.” Mwakawiro mahachi ngawofi chomene. Kweni kuti ghaleke kofyeka pa nyengo ya nkhondo, “ŵakughanozgekereska” dankha pambere ghandalute ku nkhondo. Ivi vikuyana waka na ivyo ise tingachita. Chipulikano na chikanga tikubabika navyo yayi. Kweni tikwenera kuŵikapo mtima kuti tiŵe nayo mikhaliro iyi. Kuti nifiske kuchita ivi, nkhamanya kuzirwa kwa kuchita vinthu vyauzimu nyengo zose, kuŵazga Baibolo, na lurombo, ndipo ivi vyanovwira chomene kuti chipulikano chane chileke kusunkhunyika.

Galina Yatsik a

Chaka cha kubabikira: 1950 (Zeya)

Mbiri yake: Wakagwiranga ntchito yakuwona vya ndalama zakuzengera mu msumba kweniso za madipatimenti yakunozga vinthu. Pasono wali kupumura ntchito iyi

Wakatorana na Valeriy mu 1971. Ŵali na ŵana ŵaŵiri, mwanakazi na mwanalume. Ni chokoro kufuma mu 1995

Apo wakakuranga wakagomezganga yayi kuti Chiuta waliko kweni wakakhumbanga kumanya umo umoyo ukambira. Wakamba kuŵerenga magazini gha Gongwe la Mulinda na Wukani! kweniso wakamba kuwungana. Pamanyuma wakasanga ukaboni wakuti Mlengi waliko nadi. Wakabatizika mu 1994

Ivyo Wakayowoya

Pa nkhani ya lurombo, ni vinthu wuli ivyo mwasambirapo pa nyengo ya masuzgo iyi?

Nkhuwona kuti pa vinthu vyamabuchi, ntchiwemi chomene kulomba lurombo lufupi kweni lwakudunjika. Ivi vikunovwira kuti mtima wane uŵenge m’malo na kuchita vinthu mwamahara. Ntchakukondweska chomene kumanya kuti ŵanji nawo ŵakunilombera. Lemba ya Yakobe 5:16, likuti: “Ŵeyelero la munthu murunji lili na nkhongono yikuru chomene.” Namanya kuti malurombo agho ŵanji ŵakunilombera ghanovwira chomene kuti niŵe na mtende wa mu mtima kweniso kuti nileke kuchita wofi. Ntheura malurombo agho nkhulomba kweniso agho ŵanji ŵakunilombera ghakunovwira kuti nilutilire kuŵa wakukhora mwauzimu.

Yelena Yatsyk

Chaka cha kubabikira: 1972 (Zeya)

Mbiri yake: Wakugwira ntchito yakusona malaya

Wakatorana na Andrey mu 1994. Ŵali na mwana yumoza mwanakazi

Amama ŵa Yelena na mudumbu wawo Yevgeniy Bitusov, ndiwo ŵakamba kusambira Baibolo na Ŵakaboni ŵa Yehova. Yelena wakamba kulondezga fundo za mu Baibolo ndipo umoyo wake ukasintha chomene. Wakabatizika mu 1997

Ivyo Wakayowoya

Kasi nthambuzgo iyi yamukhwaskani wuli

Ubwezi wane na Yehova wakhora chomene. Nkhulomba kwa Yehova kuti wanipe mtende wa mu mtima, ndipo nkhuwona umo wakuzgolera malurombo ghane pakunipa nadi mtende wa mu mtima. Kweniso nkhuwonga chitemwa cha ŵabali na ŵadumbu. Nkhukhozgeka chomene kumanya kuti nyengo zose mbakunozgeka kunovwira para nasangana na suzgo. Nkhujiwona kuti nili pakati pa ŵanthu ŵa mbumba yimoza. Ndipo nane namanya kuti nkhwenera kulombera awo ŵali mu jele nga umo viliri na mubali wane Yevgeniy. Nkhuŵalombera zuŵa lililose.

Nthambuzgo iyo ŵadumbu ŵithu ŵakujumphamo yikutikumbuska kuti Yehova wakupulika malurombo ghithu ndipo watovwirenge kuti tiŵe na makhaliro agho ghangatovwira kuzizipizga masuzgo ghalighose.—1 Yohane 5:14.

Nyengo

March 21, 2019

Ŵakasecha nyumba ya Moiseyenko
October 13, 2020

Ŵakasecha nyumba ya Yelena na Galina
November 22, 2021

Ŵakaŵajulira mulandu
February 15, 2022

Ŵakakanizgika kwenda kufuma mu vigaŵa vinyake
April 24, 2023

Khoti likamba kutegherezga mulandu wawo

a Mudumbu Galina Yatsik na Yelena Yatsyk mphaubali yayi.

Wonaniso

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI