JULY 26, 2022
RUSSIA

Lurombo Lukuŵawovwira Kusanga Nkhongono

JULANI

Khoti la Surgut ilo lili ku Chigaŵa cha Khanty-Mansi Autonomous—Yugra lipelekenge chigamuro chake sonosono apa pa mulandu wa ŵabali 17 na mudumbu yumoza. Ŵanyake mwa ŵabali aŵa ni Mubali Vyacheslav Boronos, Saveliy Gargalyk, Yevgeniy Kayryak, Artem Kim, Sergey Loginov, Aleksey Plekhov, na Sergey Volosnikov. Wakwimira boma pa milandu wachali wandapemphe chilango icho ŵangapika.

Nyengo

February 15, 2019

Ŵapolisi ŵakasecha nyumba zinandi chomene za Ŵakaboni ŵa Yehova ku Surgut na misumba yapafupi. Kufuma apo, ŵakakaka ŵabali ŵatatu na kukaŵasunga dankha mu jele, Sergey Loginov wakaŵa yumoza mwa ŵabali aŵa. Pamanyuma mubali yumoza ŵakamutuma kuti walute ku chipatala cha ŵanthu ŵakuzweta mutu. Ŵabali 7 awo ŵalongosoreka mu nkhani iyi ŵakaŵachitira nkhaza chifukwa chakuti ŵakakana kuvumbura vyakukhwaskana na Ŵakaboni ŵanyawo
February 26, 2019

Khoti Lakuwona vya Wanangwa wa Ŵanthu ku Europe likati boma la Russia limufumiske Sergey Loginov mu jele kuti wakapokere wovwiri wa ku chipatala
April 11, 2019

Sergey Loginov wakafumiskika mu jele umo ŵakamusunganga
October 29, 2021

Khoti likamba kutegherezga mulandu wawo

Vyakukhwaskana na ŵanthu aŵa

Yevgeniy Kayryak

Chaka cha kubabikira: 1986 (Surgut)

Mbiri yake: Iyo pamoza na ŵapapi ŵake kweniso ŵana ŵakwake ŵaŵiri, ŵakamba kusambira Baibolo cha m’ma 1990. Wakabatizika mu 2006. Wakatorana na Rosanna mu 2016

Ivyo Wakayowoya

Ntchivichi chamovwirani kuti muleke kwenjerwa chomene?

Nyengo zinyake nkhutegherezganga sumu zithu za Ufumu. Lurombo lwakufumira pasi pa mtima nalo likunizikiska mtima. Apo nkhaŵa pa jele la panyumba, nkhalemba mavesi gha mu Baibolo na sumu zithu mu notibuku.

Kanandi nkhutemwa kughanaghanirapo mazgu gha pa Mateyu 10:28: “Kopa awo ŵakukoma thupi chara pakuti ŵangakoma umoyo chara.” Mazgu agha, aghoso ghali mu sumu yithu yinyake, ghakunovwira kuti nimugomezgenge chomene Yehova.

Kasi mukajipulikanga wuli apo khoti likategherezganga mulandu winu?

Nkhuwona kuti Yehova wakanipa chikanga. . . . Para unenesko ukuwumanya, palije chifukwa chakuti wamunthu ujiyimbirengeso mulandu. Nkhayimilira mu khoti mwachikanga ndipo nkhawopanga yayi, nkhayowoyanga makora waka mwantchindi. Vyose ivyo vikachitikanga para khoti likutegherezga mulandu wane, vikatikhozganga chomene ine na muwoli wane.

Sergey Loginov

Chaka cha kubabikira: 1961 (Republic of Bashkortostan)

Mbiri yake: Ŵapapi ŵake ŵakafwa apo wakaŵa muchoko. Wapwelelera ankhazi ŵake kwa vyaka vinandi. Wakasambira vya uinjiniya wa vya magesi ndipo wagwira ntchito ku kampani ya vya magesi kwa vyaka vinandi

Mu 1993, wakamba kusambira Baibolo na Ŵakaboni ŵa Yehova. Wakakhorwa na fundo za mu Baibolo ndipo wakakhumbanga kuzilondezga. Wakabatizika mu 1996

Ivyo Wakayowoya

Ntchivichi chikamovwirani kuti mulutilire kugomezgeka nangauli ŵakamuchitiraninge nkhaza apo mukaŵa mu jele?

Nkhalomba kwa Yehova na kumupempha kuti wanipe nkhongono zakuzizipizgira . . . na kunovwira kuti mtima uŵe m’malo . . . Para wamunthu wasangana na suzgo ilo palije icho ungachitapo, ndipo ukuwona kuti Yehova wakukovwira mu nthowa yapadera. Ndimo vikaŵira kwa ine, ndipo nkhathembanga chomene Yehova.

Aleksey Plekhov

Chaka cha kubabikira: 1977 (Surgut)

Mbiri yake: Kufuma waka apo wakaŵa muchoko, wakajifumbanga vyakukhwaskana na Mlengi. Wakasanga mazgoro ghakukhorweska gha mafumbo ghake mu Baibolo. Wakabatizika mu 1996

Wakugwira ntchito yakotchelera visulo. Wakatorana na Anna mu 2013. Ŵali na ŵana ŵanakazi ŵaŵiri

Ivyo Wakayowoya

Ntchivichi chikamovwirani kuti mulutilire kugomezgeka nangauli mukatambuzgikanga?

Yesu wakaŵachenjezgerathu ŵalondezgi ŵake kuti ŵatambuzgikenge, ntheura ndivyo nkhakhazganga kuti vinichitikirenge. Vingachitika kuti wamunthu ukumanya umo chinthu chinyake chikuŵira, kweni para chinthu icho chakuchitikira ndipo ukumanya makora umo vikuŵira nadi. Pa vyose ivyo nakumana navyo, nkhaŵikapo mtima chomene kuti nilutilire kugomezgeka na kuŵa wakukhora m’paka kuumaliro. Sumu yakuti “Nipani Chikanga” yikaŵa waka mu mutu zuŵa lose lira m’paka mise, ndipo kanandi waka nkhatemwanga kwimba para vinthu vili makora yayi.

Apo ŵabali ŵithu ŵakuchita chikanga kuzizipizga viyezgo vyose ivi, tili na chigomezgo chose kuti Yehova wakupulika malurombo ghawo na kuŵazgora mwaluŵiro para ŵali mu suzgo.—Salimo 69:17.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI