NOVEMBER 8, 2022
RUSSIA

Lurombo na Kuŵerenga Baibolo Vikanovwira Kuti Nizizipizge

JULANI

Khoti la Maykop ilo lili ku Republic of Adygeyav sonosono apa ligamurenge mulandu wa Mubali Nikolay Saparov. Wakwimira boma pa milandu wachali wandapemphe chilango icho wangapika.

Nyengo

March 22, 2022

Ŵakamba kumupa mulandu
March 23, 2022

Nikolay wakakakika apo wakaŵa pa chiŵanja cha ndege lumoza na muwoli wake na mwana wake msungwana. Ŵati ŵamufumba mafumbo, ŵamazaza ŵakamupa mulandu wakuti wakulongozga milimo ya gulu ilo likuchita vinthu vyakofya. Wakatumizgika ku jele ilo ŵakusungako ŵanthu awo mulandu wawo underuzgike. Pamanyuma ŵakakasecha nyumba yake
March 24, 2022

Nikolay ŵakamutuma ku jele uko ŵakamusunga kulindilira kuti mulandu wake weruzgike
May 19, 2022

Khoti likamba kutegherezga mulandu

Vyakukhwaskana na munthu uyu

Nikolay Saparov

Chaka cha kubabikira: 1981 (Saint Petersburg, Chigaŵa cha Leningrad)

Mbiri yake: Wakagwiranga ntchito ya kulaŵilira pa kampani yinyake

Wakabatizika na kuŵa Kaboni wa Yehova mu 1997. Wakatorana na Nataliya mu 2004. Ŵali na mwana yumoza mwanakazi

Ivyo Wakayowoya muwoli wa Nikolay, Nataliya a

Ntchivichi chikumovwira Nikolay kuzizipizga apo ŵakumusunga mu jele?

Pa myezi yitatu yose iyo waŵira ku jele, Nikolay wafiska kuŵazga Baibolo lose maulendo ghaŵiri. Wakulutilira kuŵa wakukondwa. Wakulomba kwa Chiuta nyengo zose ndipo wakuti sono ubwezi wake na Yehova wakhora chomene. Nangauli Nikolay wandapokerepo makalata ghithu, kweni ise tikupokera makalata ghake kanandi waka. Wakuyowoya kuti wakutitemwa chomene ndiposo wakutighanaghanira! Kweniso wakutiphalirako vinyake ivyo wasambira na umo Yehova wakumovwilira.

Ntchivichi chamovwirani kuti namwe muzizipizge?

Kufuma waka apo ŵali kumusungira mu jele, tikazomerezgeka kuwonana kamoza pera. Ntchakusuzga chomene kukhala waliyose kwayekha. Mulenji uliwose nkhuwuka masozi ghali mu maso, kuwona kuti nitandalengeso nekha kwambura kumuwona mfumu wane. Ntheura chakwamba icho nkhuchita nkhulomba kwa Chiuta m’paka nambe kujipulikako makora. Pamanyuma mbwe nkhwamba kuŵerenga Baibolo pafupifupi ora limoza. Pa chifukwa ichi, nkhuwona kuti Yehova wali pafupi chomene na ine.

Chiyelezgero cha mbumba ya Saparov chikutikumbuska kuti nyengo zose Yehova wakupulika para ŵateŵeti ŵake ŵakugomezgeka ‘ŵakupempha wovwiri.’—Salimo 119:147.

a Apo tikalembanga nkhani iyi, Mubali Saparov wakaŵa ŵachali kusungika mu jele, tikatondeka kuyowoya nayo.