Khoti la mu Msumba wa Sharypovo ilo lili ku Chigaŵa cha Krasnoyarsk sonosono apa lipelekenge chigamuro chake pa mulandu wa Mubali Anton Ostapenko. a

Anton Ostapenko

• Chaka cha kubabikira: 1991 (ku Ekibastuz, Kazakhstan)

• Mbiri yake: Wakugwira ntchito ku kampani ya vya magesi ndipo ndiyo wakuwonelera mashini ghakuthukizga vinthu nga ni maji na vinyake. Amama ŵake ndiwo ŵakamusambizga Baibolo apo iyo na mudumbu wake, ŵakaŵa ŵana ŵachoko. Wakabatizika na kuŵa Kaboni wa Yehova mu 2005

  Wakatorana na muwoli wake, Natalya, mu 2015. Ŵakutemwa maseŵera gha snowboarding na skiing (maseŵera gha kuchimbira pa chiwuvi chakukhoma). Anton wakutemwaso kulizga gitara, kuŵeja somba, na kutchaya tennis

Pa April 19, 2019, ŵamazaza ku Sharypovo ŵakasecha nyumba 10 za Ŵakaboni ŵa Yehova ndipo ŵakaŵafumba mafumbo ŵabali na ŵadumbu awo ŵakaŵapo panyengo iyo ŵakasechanga. Mubali Anton Ostapenko ŵakamukaka na kumusunga mu jele ndipo ŵakamufumiska pa December 20, 2019. Ŵakumupa mulandu wakulongozga milimo ya gulu ilo “likuchita vinthu vyakofya.”

Mu myezi 6 iyo wakaŵa mu jele, wakaŵanga na nyengo yichoko waka iyo wakafumirangapo pa kamera iyo yikajamburanga ivyo wakuchita, kuti wakachite vinthu vinyake nga nkhuluta pa sinki mu selo umo wakaŵa kweniso para wakulira.

Lurombo ndilo lukamovwira chomene kuti waŵe na nkhongono. Anton wakuti: “Nkhalomba Yehova kuti wanovwire kuti niŵe na mtima wakuzizipizga.” Kweniso wakuti: “Nkhaŵa na vinandi vyakuti nisambire. Nkhakura mwauzimu na kuŵa wankhongono. . . . Chakukondweska ntchakuti, para uli mu nyengo yakusuzga [nga ni iyi], vikuŵa nga kuti wafuma mu kilasi ndipo waluta kuwaro kuti ukachite ivyo wasambira. Ndipo ni nyengo zose yayi apo mu selo mukuŵa Baibolo. Pambere nindakakike, ningati waka nkhaŵerenga waka vyakukhwaskana na Yehova. Kweni apo nkhaŵa kura [ku jele], Yehova wakanilongora umo iyo waliri nadi. Ntheura ningayowoya kuti, nkhaŵa na mwaŵi wakumumanya makora Chiuta. Wakaŵa waka Chiuta Wankhongonozose yayi kwa ine, kweni wakaŵaso Dada wachitemwa uyo wakapulikiskanga masuzgo ghane kweniso wakanipanga wovwiri munthowa iyo nkhakhazganga yayi ndiposo panyengo yakwenelera.”

Sumu za Ufumu nazo zikamukhozga chomene. Iyo wakuti: “Pambere nindakakike, ine na muwoli wane tikimbiranga lumoza sumu ndipo ivi vikatovwira kuti tizisunge pamtima. Sumu zikanovwira chomene apo nkhaŵa mu jele umo ŵakanisunganga. Para ŵazimwiska magesi, nkhaŵanga na mwaŵi ukuru wakulomba na kwimba sumu, ndipo ivi vikanovwiranga kuti nigone tulo tuwemi uku mtima uli m’malo.”

Apo Anton wakulindilira chigamuro cha mulandu wake, wali na mwaŵi wakulutilira kugwira ntchito yake yakulembeka. Ndipouli, wakuzomerezgeka yayi kufumamo mu chigaŵa icho wakukhala cha Sharypovo. Ivi vikupangiska kuti watondekenge kuluta na amama ŵake ku chipatala kuti ŵakakumane na dokotala.

Tikulomba ndipo tili na chigomezgo chose kuti Yehova walutilirenge kuŵapa mtende ŵabali ŵithu awo ŵakuzizipizga nthambuzgo.—Yohane 14:27.