Khoti la Voroshilovskiy ilo lili ku Rostov-on-Don, sonosono apa lipelekenge chigamuro pa mulandu wa Mudumbu Olga Ganusha. a Wakwimira boma pa milandu wachali wandapemphe chilango icho mudumbu uyu wangapika.

Olga Ganusha

• Chaka cha kubabikira: 1961 (Rostov-on-Don, Chigaŵa cha Rostov)

• Mbiri yake: Wali kupumura pa ntchito ndipo wakulera yekha mwana mwanalume. Wakutemwa kuluka, kupulikizga sumu, na kuŵazga mabuku

• Kuti wambe kusambira Baibolo wakanweka na chilindizga cha kuzakakhala mu paradiso lumoza na ŵabali ŵake awo ŵali kufwa. Wakabatizika na kuŵa Kaboni wa Yehova mu 1995

Kukwambilira kwa 2019, ŵamazaza ŵanyake ku Russia ŵakaŵika mwakubisilizga chakujambulira mazgu na vidiyo mu nyumba ya Mudumbu Olga Ganusha. Ŵenecho ŵakuti uwu mbukaboni, ndipo ŵakasecha nyumba yake mu June 2019. Awo ŵakasechanga ŵakaŵazga mabuku agho wakalembangamo manosi ghake, makalata, na tumabuku tunyake. Pa August 17, 2020, Mudumbu Olga wakapika mulandu, ndipo khoti likamba kutegherezga mulandu wake pa March 4, 2021. “Mulandu” wake ukusazgapo kuchita maungano na kuzomerezga kuti ŵanthu ŵawungane mu nyumba yake kweniso kuphalirako ŵanji ivyo wakugomezga. Mudumbu Lyudmila Ponomarenko na Mudumbu Galina Parkova nawo ŵakaŵafufuza ndipo milandu yawo yikutegherezgeka mu makhoti ghakupambana.

Pasono pajumpha pafupifupi vyaka viŵiri ŵachali kumufufuza na kumupa mulandu, Mudumbu Olga wakusanga nkhongono chifukwa cha kulutilira kulomba mwakudunjika. Iyo wakuti: “Zuŵa lililose nkhulomba kuti zina la Chiuta lituŵiskike chomene kuluska kumasinda kose. Nkhulombera ŵabali na ŵadumbu awo ŵakuŵasunga mu jele, awo ŵakugwira jele, na awo ŵali pa jele la panyumba kuti ŵalutilire kuchitira ukaboni kweniso kuti ŵaŵe ŵakukhora. Nkhuŵalombera kuti ŵaŵe na chipulikano chakukhora mwa Yehova pakumanya kuti Yehova wangatileka tekha yayi mu nyengo yakusuzga iyi.” Pakughanaghanira umo vinthu viliri kwa iyo, mudumbu uyu wakuti: “Nkhulomba Yehova kuti wanovwire kutonda wofi, kuti nimugomezgenge chomene kweniso kuti wanizgore mzati wachisulo na chiliŵa chamkuŵa, nga umo wakachitira na Yeremiya. Nkhukhumba kuti nifiske kuzizipizga masuzgo ghakofya nga umo vikaŵira na Ŵahebere ŵatatu. Nkhugomezga kuti namuchita vinthu mwantchindi nga ni umo wakachitira Khristu apo wakaŵa panthazi pa ŵalwani ŵake.”

Tili na chigomezgo chose kuti Yehova walutilirenge kumovwira Mudumbu Olga kweniso ŵanji awo ŵakutambuzgika chifukwa cha chipulikano chawo, na ‘woko lake lamalyero laurunji.’—Yesaya 41:10.