MAY 20, 2022
RUSSIA

Mbumba Zikuzizipizga Nthambuzgo na Wovwiri wa Yehova

JULANI

Khoti la Sovietskiy ilo lili mu Msumba wa Oryol lipelekenge chigamuro chake sonosono apa pa mulandu wa Mubali Vladimir Melnik, Vladimir Piskarev, na Artur Putintsev. Wakwimira boma pa milandu wachali wandapemphe chilango icho ŵangapika.

Nyengo

December 8, 2020

Ŵamazaza ŵakajulira mulandu Mubali Melnik, Piskarev, na Putintsev
December 9, 2020

Ŵamazaza ŵakasecha nyumba 8 za Ŵakaboni ŵa Yehova ku Oryol, kusazgapo na nyumba za ŵabali ŵatatu aŵa. Ŵakaŵakaka na kuŵasunga dankha mu jele
December 11, 2020

Mubali Melnik na Piskarev ŵatumika ku jele lakusungirako ŵanthu awo mulandu wawo underuzgike
December 14, 2020

Mubali Putintsev wasungika dankha mu jele
January 19, 2021

Ŵamazaza ŵakaphalirika kuti Mubali Piskarev wali na masuzgo ghakupambanapambana mu thupi ndipo wakukhumbikwira wovwiri wa chipatala mwaluŵiro kweni ŵakamukanira
January 21, 2021

Mubali Piskarev wakazomerezgeka kupokera munkhwala kwendera mwa muwoli wake kweni kuluta ku chipatala ŵakamukanira nipera
June 24, 2021

Mubali Piskarev wakaluta ku chipatala ndipo ŵakati wali na sitiroku. Ŵakaweleraso nayo ku jele nangauli wakaŵa makora viŵi yayi
October 29, 2021

Ŵamazaza ŵakati ŵabali aŵa ŵali na mulandu wakulongozga milimo ya gulu ilo likuchita vinthu vyakofya
January 31, 2022

Khoti likamba kutegherezga mulandu wawo

Vyakukhwaskana na ŵanthu aŵa

Vladimir Melnik

Chaka cha kubabikira: 1965 (Donetsk, Ukraine)

Mbiri yake: Wakagwirapo ku usilikari. Kufuma apo wakaŵa injiniya

Wakatorana na Irina mu 1987. Ŵali na ŵana ŵatatu ŵanakazi. Mwana wawo mwanalume wakafwa mu 1991

Wakakulira mu mbumba iyo yikagomezganga kuti Chiuta kulije. Iyo na muwoli wake ŵakamba kusambira Baibolo ŵati ŵasambira vya umoyo wa Yesu. Wakabatizika mu 1992

Ivyo Wakayowoya Muwoli wa Vladimir, Irina a

Kasi mfumu winu Vladimir wakalongora wuli kuti wakaŵikanga mtima pa kovwira ŵanji apo wakasungikanga mu jele?

Vladimir wakulutilira kutiphalira umo tingachitira kusopa kwa mbumba kwizira mu [makalata agho wakutilembera] ine na ŵana ŵithu. Kanandi wakuchita nthena kwizira mu mapowemu, ntharika, viyelezgero, maseŵero, mafumbo, na fundo zinyake za mu Baibolo.

Ulendo unyake wakamba kusambira Baibolo na munthu uyo ŵali mu selo yimoza. . . . Munthu uyu ŵali kumusamuskira mu msumba unyake. Vladimir wakuti wakuphalirako ŵanyake awo ŵali lumoza mu jele ivyo wasambira.

Vladimir Piskarev

Chaka cha kubabikira: 1956 (Karpinsk, Chigaŵa cha Sverdlovsk)

Mbiri yake: Wakaŵapo injiniya. Wakatorana na Tatyana mu 1976. Ŵali na mwana mwanalume yumoza na mwanakazi yumoza. Ŵati ŵamanya unenesko wakukhwaskana na Yesu, ŵakanweka kwamba kusambira Baibolo na Ŵakaboni ŵa Yehova. Wakabatizika mu 1995

Ivyo Wakayowoya Muwoli wa Vladimir, Tatyana b

Ntchivichi chikumovwira mfumu winu kuti walutilire kuzizipizga apo wakusungika mu jele?

Para wasangana na munthu uyo wali na mafumbo ghanandi Vladimir wakuwona kuti ni thumbiko kweniso kuti ni nthowa yimoza iyo wakukhozgekera. Nga umo mwenecho wakuyowoyera kuti, “Ntchakukondweska chomene kutangwanika na mulimo wa Fumu nanga mungaŵa muno mu jele!” Mfumu wane wakutemwa chomene kwimba sumu zithu za Ufumu, vilije kanthu kuti kwali wali nkhu. Nakuti wakutemwa chomene sumu ya mutu wakuti “Tilutilirenge Kuzizipizga.” Yikumovwira kuti wakhozge chipulikano chake, na kulutilira kugomezgeka kwa Yehova. Kanandi waka wanilemberapo mazgu gha mu sumu iyi, nga ghakuti: “Ipo tizizipizge./Na chipulikano./Chiu-ta wakutitemwa./Nadi, tiyeni tizizipizge.”

Artur Putintsev

Chaka cha kubabikira: 1970 (Chita, Chigaŵa cha Trans-Baikal)

Mbiri yake: Ndiyo ni mulara pa ŵana 6. Wakagwirapo ntchito ya vya magesi, wakaŵapo mulimi, na ntchito ya udilayivara. Wakatorana na Lyudmila mu 1993. Wakabatizika mu 2005

Ivyo Wakayowoya Muwoli wa Artur, Lyudmila c

Kasi yilipo nyengo yinyake apo mukawona kuti Yehova wamovwirani imwe pamwekha?

Ŵamazaza ŵati ŵamukaka mfumu wane na kumusunga mu jele, wakufufuza mulandu wakatipoka vinthu vithu vinyake kusazgapo na mafoni. Nkhaŵa waka nekha [ndipo nkhaŵanya nthowa yakuyowoyeskerana na waliyose]. Mahara ghakanimalira ndipo nkhalomba kwa Yehova kumupempha kuti wanovwire. Nkhamupempha kuti wanovwire kusanga nthowa ya kuyowoyeskerana na ŵabali na kuŵaphalira ivyo vyachitika. Apo galimoto iyo yikamutora mfumu wane Artur yikati lute waka, mbwenu ŵabali nawo buli. Ŵakanikhozga na kunipa foni. Ŵandanilekepo nekha mu chaka chose ichi m’paka mwahuno, ŵachali kunovwira. Nkhumanya kuti Yehova wakuzgora malurombo pa nyengo yakwenelera ndipo wakunipulikiska chomene.

Nangauli ŵanthu ŵa mumbumba izi pasono ŵakukhala mwakutalikirana, kweni tikukhozgeka kumanya kuti palije icho chaŵapatura ku chitemwa cha Yehova ndipo iyo wakulutilira kuŵavikilira.—Ŵaroma 8:38, 39.

a b c Pakuti pasono Mubali Melnik, Piskarev, na Putintsev ŵachali dankha kusungika mu jele, pakaŵa pakusuzga kupulika kwa ŵenecho.