FEBRUARY 13, 2023
RUSSIA

Mbumba Zitatu Zikutambuzgika ku Yaroslavl

JULANI

Khoti la Dzerzhinsky ilo lili ku chigaŵa cha Yaroslavl lipelekenge chigamuro chake sonosono apa pa mulandu wa Mubali Pyotr Filiznov; Mubali Aleksandr Kuznetsov na muwoli wake, Mudumbu Mariya Kuznetsova; na Mubali Andrey Vyushin. Wakwimira boma pa milandu wachali wandapemphe chilango icho ŵanthu aŵa ŵangapika.

Vyakukhwaskana na ŵanthu aŵa

Aleksandr Kuznetsov

Chaka cha kubabikira: 1982 (Moscow, Chigaŵa cha Moscow)

Mbiri yake: Wakasambizganga Chingelezi na masamu

Wakamba kusambira Baibolo mu April 2000. Wakakhorwa kuwona umo Ŵakaboni ŵa Yehova ŵakutemwerana. Wakabatizika mu 2002

Wakatorana na Mariya mu 2017. Pamanyuma pakuti ŵamufumiska mu jele, wakasangika na matenda gha kansa

Ivyo Wakayowoya

Kasi ntchivichi chikumovwirani kuti mulutilire kuŵa ŵachimwemwe nangauli ndimwe mulwari kweniso mukutambuzgika?

Nyengo zinyake nkhuŵa wachitima ndipo nkhujiwona nga ningafiska yayi kuzizipizga masuzgo ghane. Kweni nyengo zose Yehova wakunijulira “nthowa.” (1 Ŵakorinte 10:13) Lurombo lwakufumira pasi pamtima ndilo lwanovwira chomene kweniso nkhumuphalira umo nkhujipulikira. Ndipo nyengo zinyake nkhufika na pakulira para nkhulomba. Kweniso nkhukhozgeka para nkhwimba sumu zithu, kusambira Baibolo, ndiposo para nkhughanaghanirapo ivyo Yehova wali kutilayizga. Ine na muwoli wane tikuwona kuti ntchakuzirwa chomene kukhozga ŵabali na ŵadumbu ŵithu. Ivi vikutovwira kuti tileke kufipa mtima chomene na masuzgo ghithu. Kuluska vyose, tikukondwa umo Yehova wakutikhozgera na mzimu wake utuŵa kuti utovwire kuti tiŵe na mtende wa mu mtima.

Mariya Kuznetsova

Chaka cha kubabikira: 1988 (Sharypovo, Chigaŵa cha Krasnoyarsk)

Mbiri yake: Wakugwira ntchito yakujilemba yekha

Wakalereka na ŵapapi ŵake awo Mbakaboni ŵa Yehova. Wakakondwanga kusambira vya mauchimi gha mu Baibolo. Wakabatizika mu 2002

Wakatorana na Aleksandr mu 2017

Ivyo Wakayowoya

Kasi ni malemba wuli agho ghakumukhozgani chomene?

Lemba limoza ilo nkhulitemwa chomene nda Ŵakolose 1:11, ilo likuti: “Mukhozgekenge na nkhongono zose mwakuyana na nkhongono zake zauchindami kuti muzizipizge vinthu vyose ndiposo muzikire na kuŵa na chimwemwe.” Nili wakukhorwa na ivyo vyanichitikirapo kuti para nkhugomezga Yehova na kumupempha kuti wanovwire, iyo nyengo zose wakutondeka yayi kunovwira. Wakulongora chitemwa chake chakugomezgeka ku ŵateŵeti ŵake ŵakugomezgeka ndipo nyengo zose wakuŵalongora lusungu.

Andrey Vyushin

Chaka cha kubabikira: 1975 (Yaroslavl, Chigaŵa cha Yaroslavl)

Mbiri yake: Wakalereka na amama ŵake na abuya ŵake. Wakugwira ntchito yakulaŵilira vya manetiweki gha makompyuta. Wakupwelelera amama ŵake awo mbakupendera

Wakamanya Ŵakaboni ŵa Yehova apo mubwezi wake wakamba kusambira Baibolo. Ŵakaboni ŵakazgora mafumbo ghake ghose, ndipo wakawona kuti iwo ŵakulondezga ivyo ŵakupharazga. Wakabatizika mu 1995

Wakatorana na Anastasiya mu 2013. Ŵali na mwana yumoza mwanakazi

Ivyo Wakayowoya

Kasi imwe na awoli ŵinu mwachita wuli kuti mukhozge ŵanji pa nthambuzgo iyo mwasangana nayo?

Ine na muwoli wane tikukhozgeka chomene na umo Dennis Christensen wakazizipizgira masuzgo. Wakaŵa yumoza mwa ŵanthu ŵakwamba awo ŵakajalirika mu jele, kweni wakalutilira kuŵa wakukhora mu chipulikano. Chiyelezgero chake chiwemi ndicho chikatikhukiska kuti nase tichitenge mwakuyana waka. Ntheura para tasangana na ŵabali panji ŵadumbu awo ŵakufipa mtima na vinthu vinyake, tikuchita ivyo tingafiska kuti tiŵakhozge na kuŵaphalira kuti kunthazi vinthu vizamusintha, vizamuŵa nga umo tikuwonera sono yayi. Tikuŵakumbuska ŵabwezi ŵithu kuti ŵangachitanga wofi yayi na kughanaghanira umo vizamuŵira para ŵakumana na nthambuzgo. M’malo mwake, tikwenera kuwona nthambuzgo kuti ni mwaŵi withu wakulongora kuti tili na chipulikano chakukhora mwa Yehova.

Tili na chigomezgo chose kuti nga umo viliri ku ŵateŵeti ŵanayi ŵakugomezgeka ŵa Yehova aŵa, nase tingaŵa pakati pa ŵanthu ‘awo ŵakuthemba Yehova ndipo ŵasunkhunyikenge yayi.’—Salimo 125:1.

Nyengo

April 13, 2021

Ŵakaŵikika mu jele lakusungirako awo milandu yawo yinderuzgike pamanyuma pakuti ŵamazaza ŵasecha nyumba zawo
April 15, 2021

Ŵakaŵaŵika mu jele kulindilira kuti milandu yawo yeruzgike
July 14, 2021

Ŵakafwatulika mu jele ndipo ŵakakanizgika kwenda kufuma mu chigaŵa icho ŵakakhalanga
September 9, 2022

Khoti likamba kutegherezga mulandu wawo

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI