Mubali Ivan Puyda wakukumbuka kuti mise yiliyose para adada ŵake ŵafika pa nyumba, ŵakamuŵazgiranga iyo pamoza na ŵana ŵanyake 7, buku lakuti, Buku Lane la Nkhani za mu Baibolo. Wakukumbukaso kuti iyo na adada ŵake a Grigoriy, ŵakapharazgiranga lumoza mu muzi wakwawo wakuchemeka Kvitok, ndipo kanandi wakapharazgiranga asambizgi ŵake na ŵanyake ŵa ku sukulu. Apo wakaŵa munyamata, Mubali Puyda wakapharazgapo ku chigaŵa icho chikupharazgika viŵi yayi lumoza na asekuru ŵake a Pyotr Partsey, ndipo panyengo iyi wakamanya kuti asekuru ŵake ŵakuwutemwa chomene uteŵeti kweniso ŵali na mzimu wakujipata.

Kanandi Mubali Puyda wakawonanga adada ŵake kweniso asekuru ŵake ŵakuŵazga Baibolo na mabuku ghanyake ghakulongosora Baibolo. Ntheura nayo wakaŵikapo mtima kulondezga chiyelezgero chawo chiwemi.

Ndipouli pasono Mubali Puyda uyo wali na vyaka 41, wakulondezga chiyelezgero cha adada ŵake na asekuru ŵake mu nthowa iyo wakakhazganga yayi. Iyo wali kujalirika mu jele chifukwa chakuti ni muteŵeti wa Yehova. Ŵa Federal Security Service (FSB) ŵakamukaka Mubali Puyda pa May 30, 2018. Wakakhala mu jele myezi yinayi. Ŵakati ŵamufumiska, ŵakamutuma pa jele la panyumba ilo wakakhala myezi 6. Asekuru ŵake a Partsey, nawo ŵakakakika na kuŵikika mu jele mu nyengo ya muwuso wa Nazi na Soviet. Adada ŵake a Grigoriy Puyda nawo ŵakajalirika mu jele mu nyengo ya muwuso wa Soviet.

Mubali Ivan Puyda wakuti: “Pa 2 Timote 3:14, mpositole Paulosi wakalemba kuti, ‘Lutilira kulondezga vinthu ivyo ukasambira ndipo ukakhorwa na kuvigomezga, pakumanya ŵanthu awo ukasambirako vinthu ivi.’ Chifukwa chakuti nkhumanya awo nkhasambirako unenesko, vikunovwira kuti niŵe na nkhongono. Palije icho chikaŵatondeska kuteŵetera Yehova kwali mbamazaza panji jele, nakuti nthambuzgo yikukhalira muyirayira yayi. Nane nkhuchita nga ndiwo, ndipo nilutilirenge kulondezga chiyelezgero chawo chiwemi. Nakuti nkhumanya kuti para nalutilira kugomezgeka kwa Yehova, iyo wanitumbikenge.” Mubali Puyda wakulindilira ivyo khoti lidumurenge pa mulandu wake.

Mubali Puyda wakuti nyengo zinandi para adada ŵake na asekuru ŵake ŵakuyowoya nkhani zakukhwaskana na ku jele, ŵakayowoyangapo yayi vya umo umoyo ukuŵira wakusuzga ku malo agha. Kweni ŵakayowoyanga waka viwemi ivyo ŵakasangananga navyo para ŵakupharazga makani ghawemi.

A Grigoriy, awo pasono ŵali na vyaka 64, ŵakabatizika mu 1975, ŵati ŵakhala kale mu msasa wakuyuzgirako ŵanthu chaka chimoza chifukwa cha kukana kunjira usilikari. Ŵakafumiskika mu 1977. Ŵakagwiraso jele chaka chimoza mu 1986 chifukwa ŵakasangika na mabuku ghithu agho boma likakanizganga. Adada ŵawo awo nawo zina lawo likaŵa Ivan, ŵakaŵajalira mu msasa wakuyuzgirako ŵanthu kwamba mu 1944 m’paka 1950, chifukwa cha kuleka kunjilirapo pa vya charu.

A Grigoriy ŵakuti: “Chifukwa chakuti nkhaŵa na chipulikano chakukhora lekani nkhalutilira kuzizipizga apo nkhatambuzgikanga. Nkhakayikanga yayi napachoko kuti nkhwenda mu unenesko, ndiposo kuti Yehova ndiyo ni Chiuta waunenesko.”

Pasono mwana wawo, Ivan, nayo wakujumpha mu masuzgo ghakuyana waka. A Grigoriy ŵakuti, “Nkhukumbuka ivyo vikachitikanga mu nyengo ya muwuso wa Soviet, ndipo nkhuwona kuti vinthu vyakuyana waka ndivyo vikuchitikaso pasono. Ntheura nkhulomba kuti mwana wane Ivan walutilire kugomezgeka mu nyengo yakusuzga iyi mwakuti zina la Yehova lilutilire kutuŵiskika.”

Mu 1943, asekuru ŵa Ivan, a Partsey, awo pasono ŵali kufwa, ŵakaŵatuma ku msasa wa Maidenek ndipo kufuma apo ŵakaŵatuma ku msasa wa Ravensbrück, chifukwa chakuti ŵakakana kusayina chikalata chakuti ŵaleka kuteŵetera Yehova. Ŵakaŵafumiska apo muwuso wa Nazi ukathereskeka mu 1945. Ŵakaŵakakaso mu 1952 ndipo ŵakaŵapa chilango chakuti ŵakomeke. Ndipouli chilango ichi ŵakachisintha, ndipo ŵakaŵafumiska mu 1956. Mubali Partsey wakakakikaso chifukwa cha chipulikano chake mu 1958 ndipo ŵakamufumiska mu 1964.

Ivan wakuti, “Chiyelezgero chiwemi icho asekuru ŵakalongora, chanovwira chomene. Para ŵazakawuskika, nizamuŵaphalira kuti naneso nkhasangana na viyezgo vyanthena ivyo iwo ŵakasangana navyo, ndipo chiyelezgero chawo chikanovwira kuti nilutilire kugomezgeka kweniso kuŵa wachikanga.”

Ivan wakutiso, “Palije uyo wanganipoka chipulikano chane kweniso kunilekeska kutemwa Chiuta wane, Yehova.” Nakuti kanandi awo ŵakufufuza vya milandu nkhuŵaphaliranga kuti: ‘Icho imwe mungafiska nkhunikaka na kunijalira mu jele, kweni palije icho mungachita kuti musinthe kaghanaghaniro kane panji ivyo vili mu mtima mwane.’”

Ntchivichi chikawovwira ŵabali ŵithu mu nyengo yakusuzga iyi?

Ivan wakuti: “Pa Milimo 14:22, tikuŵazga kuti, ‘Tikwenera kujumpha mu visuzgo vinandi kuti tikanjire mu Ufumu wa Chiuta.’ Mkhristu waliyose wakusangana na viyezgo vyakupambanapambana. Ni wose yayi awo ŵangajalirika mu jele. Nyengo zinyake ungaŵa ulwari panji nyifwa ya ŵakutemweka ŵithu. Para tikuwona vinthu mwakwenelera kweniso tili paubwezi wakukhora na Yehova, mbwenu tizizipizgenge masuzgo ghose agho tingasangana nagho. Nyengo zose Yehova ngwakunozgeka kovwira ŵanthu ŵake.”

Adada ŵake a Grigoriy, ŵakuti: “Khozgani ubwezi winu na Yehova. Muŵe nayo paubwezi wakukhora. Ntchakuzirwa chomene kuti tiŵe na ukaboni wakukhorweska kuti tili mu unenesko, ndipo ivi vitovwirenge kuti tichite chilichose icho tingafiska kuti tilutilire kuteŵetera Yehova. Iyo wazamumutumbikani chifukwa cha vyose ivyo mukuyezgayezga kuchita.”

Tikukhozgeka chomene para tikuŵazga nkhani zakulongosora umo Yehova wakovwilira ŵabali na ŵadumbu ŵithu awo ŵakutambuzgika chifukwa cha chipulikano chawo. Tikulutilira kulombera ŵabali ŵithu ku Russia kuti ŵalutilire kuŵa na chikanga na kusanga nkhongono mu layizgo la Yehova lakuti: “Kopa chara . . . Njombe yako yiŵenge yikuru chomene.”—Genizesi 15:1.