Khoti la Circassian ku Karachayevo-Circassian Republic lipelekenge chigamuro chake sonosono apa pa mulandu wa Mubali Albert Batchaev. a

Albert Batchaev

• Chaka cha kubabikira: 1976 (ku Karachayevsk)

• Mbiri yake: Wali na ŵadumbu ŵake ŵatatu na munung’una wake yumoza. Amama ŵake ŵali kufwa ndipo ndiyo wakupwelelera adada ŵake awo mbachekuru. Wakasambira vya uloya pa sukulu yinyake ya ŵasilikari ndipo wakagwiranga ntchito ku dipatimenti ya kufufuza milandu

  Wakamba kusambira Baibolo ndipo wakakhorwa kuti ivyo likuyowoya mbunenesko. Wakabatizika na kuŵa Kaboni wa Yehova mu 2004. Wakatorana na muwoli wake Zhanna, mu 2007. Pasono wakugwira ntchito ya kuŵikira vijaro kuti wasange sopo na mchere. Wali na masuzgo ghanyake mu thupi agho ghakumutondeska kuchita ntchito zinyake. Iyo na muwoli wake Zhanna ŵakutemwa kwendeska galimoto mu malo ghakupambanapambana kweniso kutembeya mu mapiri gha mu chigaŵa chawo

Pa December 16, 2019, ŵa Federal Security Service (FSB) ŵakasecha nyumba zinandi mu msumba wa Cherkessk. Ivi vikapangiska kuti ŵabali ŵanandi ŵakakike.

Zuŵa lakulondezgapo, wose ŵakafumiskika kuwuskako waka Mubali Albert Batchaev. Ŵamazaza ŵakati ŵamusunge dankha mu jele kwa maora pafupifupi 72 ndipo pamanyuma ŵakati wali na mulandu wakulongozga ŵanyake pakwimba sumu na kulomba kwa Yehova. Albert wakati wapika mulandu, ŵamazaza ŵakamba kuŵalonda ŵabwezi na ŵanthu ŵanyake awo ŵakaŵira lumoza na mubali uyu.

Albert wakuti: “Ŵakati ŵaniŵika mu jele umo ŵakanisunganga, na kujara chijaro cha chisulo icho chikawonekanga chikuru na chakofya, nkhachita wofi chomene. Nkhawonanga nga kuti mbwenu kwamara, nizamufumaso yayi ndipo nifwirenge mwenemumo. Nkhafipiranga mtima chomene muwoli wane na ŵabali.”

Albert wakakhala pafupifupi myezi yiŵiri mu jele umo wakasungikanga, ndipo kufuma apo ŵakamutuma pa jele la panyumba. Pati pajumpha sabata yimoza, ŵakamutumaso ku jele uko ŵakakamusunga kwa masabata 7. Albert wakuti: “Apo nkhaŵa mu jele, chomene apo ŵakanisunganga kwanekha, ndipo nkhapulikiska makora chomene uwemi wakuŵa na ndondomeko ya kuchitira vinthu vyauzimu na kuŵa na vyakuchita vinandi mu ntchito ya Ufumu. Ivi vikanipa nkhongono izo nkhakhumbikwiranga kuti nileke kuwelera nyuma na kutaya chipulikano chane, nilutilire kuzizipizga, kuŵa na chigomezgo kweniso kutemwa Yehova na ŵabali.”

Apo wakaŵa mu jele wakaŵa na mwaŵi wakusanga Baibolo, icho ntchakusuzga chomene. Albert wakuti: “Baibolo ndilo likanovwira chomene kuti nizizipizge. Likanovwira kuti nileke kutaya mtima kweniso kuti nileke kukhalira waka kuchita phukwa chifukwa cha kuŵa kutali na ŵanthu awo nkhuŵatemwa.” Pa nyengo iyi ndipo wakapulikiska umo ŵanthu ŵakugomezgeka awo ŵakuzunulika mu Baibolo ŵakajipulikiranga apo ŵakatambuzgikanga kweniso kujalirika mu jele. Iyo wakuti: “Apo nkhaŵa mu jele ndipo nkhapulikiska makora ivyo ŵakakumana navyo kweniso umo ŵakajipulikiranga ndipo nkhakhozgeka chomene. Pasono nkhuwona kuti nili na ŵabwezi ŵanandi chomene, ŵa mu nyengo yakale na sono wuwo.”

Mu April 2020, khoti likati Albert walute pa jele la panyumba kwa myezi yiŵiri. Nyengo iyi ŵasazgirako maulendo ghanayi. Cha kuumaliro wa March ŵakamusazgirakoso nyengo iyi ndipo yizamumara kuumaliro wa June 2021.

Tikumanya kuti Yehova walutilirenge kumupa nkhongono na kumupwelelera Mubali Batchaev na ŵateŵeti ŵake ŵakugomezgeka wose awo ŵakutambuzgika.—1 Midauko 29:12.