Khoti la Zavodskoy ku Kemerovo lipelekenge chigamuro chake sonosono pa mulandu wa Mubali Aleksandr Bondarchuk na Sergey Yavushkin. a

Aleksandr Bondarchuk

• Chaka cha kubabikira: 1974 (ku Topki, Chigaŵa cha Kemerovo)

• Mbiri yake: Adada ŵake ŵakafwa apo wakaŵa na vyaka 19. Wakaluta ku sukulu ya kusambizga kwendeska vimathirakitala. Kufuma apo wakasambira vya ukalipentara. Pasono wakugwira ntchito ya kunozga mashini agho ghakuthukizga vinthu para ghaphulika. Wakutemwa kuŵeja somba, kuseŵera mu chiwuvi, kwendeska njinga, na kuchimbira

• Wakatorana na muwoli wake Elena, mu 1992. Mwanakazi wake ndiyo wakamba kusambira Baibolo na Ŵakaboni ŵa Yehova. Nthengwa yawo yikapona chifukwa cha kulondezga fundo za mu Baibolo. Ŵali na ŵana ŵaŵiri ŵanalume.

Sergey Yavushkin

• Chaka cha kubabikira: 1960 (ku Rubtsovsk, Chigaŵa cha Altai)

• Mbiri yake: Wagwira ntchito ya kuwotchelera visulo kwa vyaka vinandi. Pasono wakugwira ntchito ya kunozga maloko. Kufuma pa wana, wakutemwa kulizga gitara na maseŵera ghakupambanapambana

• Wakatorana na muwoli wake Tatiana, mu 1990. Pati pajumpha nyengo yichoko waka, ŵakamba kusambira Baibolo na Ŵakaboni ŵa Yehova. Iwo ŵakakhorwa chomene na fundo yakuti nangauli Baibolo ni buku lakale chomene kweni lichali lakovwira mazuŵa ghano. Ŵali na mwana mwanalume na mwanakazi

Pa July 22, 2019, nyengo ya 6 koloko mulenji, ŵapolisi ŵakasecha kachiŵiri nyumba ya Mubali Aleksandr Bondarchuk na Sergey Yavushkin. Pa nyengo iyi, ŵabali aŵa ŵakakakika ndipo ŵawoli ŵawo ŵakafumbika mafumbo. Ŵapolisi aŵa ŵakapokaso vinthu vya ŵabali aŵa nga ni mafoni.

Aleksandr na Sergey ŵakaŵasunga dankha kwa mazuŵa ghaŵiri. Kufuma apo, Khoti la ku Kemerovo likati ŵakhale pa jele la panyumba kwa myezi yiŵiri, ndipo nyengo iyi ŵakasazgirako maulendo 6.

Apo ŵabali aŵa ŵali pa jele la panyumba, wose ŵakukanizgika kwenda mtunda wakujumpha mamita 300 kufuma pa nyumba zawo. Ivi vikung’anamura kuti ŵangaluta yayi ku ntchito. Ndipouli, pambere ŵandambe kuŵapa mulandu, ŵabali ŵaŵiri aŵa ŵakaŵa na lumbiri luwemi mu chigaŵa chawo, kweniso ku mabwana ghawo. Ivi vikapangiska kuti, mabwana gha ŵabali aŵa ghapemphe uyo wakaŵafufuzanga mulandu kuti waŵazomerezge kuluta kukagwira ntchito. Ndipouli pempho lawo ŵakalikana.

Aleksandr na banja lake ŵajiwonera ŵekha umo Yehova wakuŵawovwilira. Pakuti pasono Aleksandr wakugwiraso ntchito yayi kweniso ma akaunti ghawo gha ku banki ŵali kuŵajalira, ntchakusuzga kuti ŵasange ndalama zakugulira vyakukhumbikwa. Ndipouli, iyo wakuti: “Chifukwa cha chiyezgo ichi, nasambira kuthemba chomene Yehova kuluska kumasinda kose. Apo nkhaŵa kuti nindambe kutambuzgika, nkhaliwonanga kaŵirikaŵiri yayi woko la Yehova, kweni pasono nkhuwona kuti Yehova wakunovwira nyengo zose, niti pa ora lililose kweniso zuŵa lililose. Iyo wakunitemwa ndipo wakunilekapo nekha yayi, panji ŵamumbumba yane kwambura kutovwira.”

Mulandu uwo ŵakumupa Sergey ukapangiska kuti wambe kusuzgika chomene maghanoghano. Ivi vikapangiska kuti wakoleke na sitiroku. Nangauli wali makora viŵi yayi, kweni wakulutilira kuŵa wakukondwa. Iyo wakuti: “Tikwenera kuwona masuzgo agho tikusangana nagho sono kuti ngakanyengo kweniso ghachoko, ndipouli ntchipusu yayi kuzizipizga chilichose icho chingatiwira.”

Sergey wakusanga nkhongono na mazgu gha pa 1 Ŵakorinte 15:58, apo pakuti “mulimo winu uwo mukuchita mwa Fumu ngwawaka yayi.” Sergey wakuti: “Yehova wakukumbuka chilichose, ndipo wazamuluwapo yayi viwemi vyose ivyo tikumuchitira.”

Tikuŵalombera ŵabali na ŵadumbu ŵithu ku Russia awo ŵazizipizga nthambuzgo kwa vyaka vinandi. Mphanyi ŵalutilira kukhozgeka na kusanga nkhongono mu Mazgu gha Chiuta agho ghakuti: “Yehova wakukondwa na awo ŵakumopa, awo ŵakulindilira lusungu lwake.”—Salimo 147:11.