Pa February 10, 2021, Khoti la Abinskiy ilo lili ku Chigaŵa cha Krasnodar, likeruzga kuti Mubali Aleksandr Ivshin wali na mulandu. Khoti ili likati wakagwire jele vyaka 7 na hafu, icho ntchilango chikuru chomene icho ŵapeleka kwa yumoza wa Ŵakaboni ŵa Yehova kufuma waka apo Khoti Likuru ku Russia likakanizgira ntchito yithu mu 2017.

Aleksandr Ivshin

• Chaka cha kubabikira: 1957 (ku Katav-Ivanovsk)

• Mbiri yake: Pambere wandapumure pa ntchito, wakagwiliskiranga ntchito mashini gha kupalira mathabwa, wakagwirangaso ntchito yakuwiska makuni, kweniso wakaŵa injiniya. Wakatora Galina, mu 1974. Ŵali na ŵana ŵanakazi ŵaŵiri na ŵazukuru 8

  Wakati walwara chomene, wakajifumbanga chifukwa icho taŵanthu tiliri na umoyo. Wakati waŵerenga mabuku ghatatu gha Makani Ghawemi mu usiku umoza pera, wakamba kusambira Baibolo. Wakabatizika mu 1995

Ŵakaboni ŵa Yehova ku Abinsk, ŵakamba kupika milandu mu 2015. Iwo ŵakati gulu la Ŵakaboni ŵa Yehova likuchita vinthu mwakutalulira ndipo ŵakati ndakukanizgika. Pati pajumpha vyaka pafupifupi 5 pa April 23, 2020, ŵakamba kumuzenga mulandu Mubali Aleksandr Ivshin. Umoza mwa “milandu” iyo ŵakumupa ngwakuti wakawovwirangapo pakunozga maungano gha chisopa agho ghakachitikanga kwizira pa videoconference na kwimba sumu za Ufumu.

Chifukwa cha ivyo vikachitika apo ŵapolisi ŵakaluta kukasecha ku nyumba ya Mubali Aleksandr na muwoli wake Galina, vikapangiska kuti wose Bp yikwere chomene. Myezi yati yajumphapo kufuma apo ŵakasechera mu nyumba yake Mubali Aleksandr, ŵakamupokaso galimoto. Nangauli Mubali Aleksandr wasangana na masuzgo ghose agha, kweni wakulutilira kuŵa wakukondwa. Mu mazgu ghake ghaumaliro apo wakaŵa ku khoti, wakayowoya kuti: “Nkhuzizwa yayi kuti khoti likuti lanisanga na mulandu, chifukwa ni vyakuti Yesu wakayowoya kale. Pa Mateyu 10:18, pakuti: ‘Ndipo ŵazamumutolerani panthazi pa ŵalongozgi na mathemba chifukwa cha zina lane, kuti uŵe ukaboni kwa iwo na ku mitundu.’ . . . Mazgu gha Yesu agha ghakunifipiska mtima yayi. Kweni ghakunipangiska kuti niŵe wakukondwa, chifukwa nkhuphalira khoti mwambura wofi vitumbiko ivyo awo ŵakumanya njara yawo yauzimu ŵazamusanga kunthazi.”

Kugomezgeka kwa Mubali Aleksandr na muwoli wake Galina nako kwachitira ukaboni ku Russia na vigaŵa vyose vya charu chapasi. Tili na chigomezgo chose kuti ŵatumbikikenge chomene chifukwa cha kugomezga Yehova.—Yeremiya 17:7.