Pa February 10, 2021, Khoti la Abinskiy ilo lili ku Chigaŵa cha Krasnodar, Russia, likeruzga kuti Mubali Aleksandr Ivshin uyo wali na vyaka 63, wakagwire jele vyaka 7 na hafu. Ichi ntchilango chikuru chomene icho yumoza wa Ŵakaboni ŵa Yehova wapika kufuma waka apo ntchito yithu yikakanizgikira mu 2017.

Mubali Ivshin ŵakati wali na mulandu kufuma waka mu April 23, 2020. Wakapika “milandu” yakuti wakawovwirangapo pakunozga maungano gha chisopa agho ghakachitikanga kwizira pa videoconference na kwimba sumu za Ufumu. Mu mazgu ghake gha umaliro wakalongora kuti wali na chipulikano chakukhora mu ivyo wakugomezga. Iyo wakati: “Umoyo wane wose wajintha pakulondezga fundo za mu Baibolo, izo nizakutalulira yayi panji zakupangiska ŵanthu kuti ŵatinkhanenge.”