Khoti la Kondopoga ilo lili ku Republic of Karelia lipelekenge chigamuro chake sonosono apa pa mulandu wa Mubali Aleksey Smelov. Uyo wakwimira boma pa milandu wapempha kuti mubali uyu walipire ndalama zakukwana madola pafupifupi 6,410 gha ku America.

1. July 23, 2019

   Ŵamazaza ŵakamujulira mulandu Aleksey, wakuti ni mulongozgi wa gulu la chisopa ilo ndakukanizgika ndipo wakatoramo chigaŵa pakunozga maungano ghake na “milimo yake yachibisibisi”

2. July 31, 2019

   Ŵa FSB ŵakasecha nyumba 15 za Ŵakaboni ŵa Yehova kweniso malo agho ŵakugwirako ntchito ku Kondopoga na Petrozavodsk. Ŵamazaza awo ŵakapusikizgira kuti ni mapulambara ŵakanjira mu nyumba ya Smelov na kuyisecha. Aleksey na muwoli wake Irina, ŵakaŵatolera ku ofesi ya ŵa FSB ya mu chigaŵa icho ŵakakhalanga ndipo ŵakaŵafumba mafumbo. Kufuma apo, Aleksey ŵakaluta nayo ku ofesi yikuru ya ŵa FSB ku Petrozavodsk. Ŵakamufumiska cha m’ma hafu 11 usiku na kumukanizga kwenda kufuma mu chigaŵa icho wakakhalanga

3. August 7, 2019

   Ŵamazaza ŵakati Aleksey wali na mulandu kuyana na Chigaŵa 1 cha Dango 282.2 pa malango gha boma la Russia

4. April 9, 2020

   Ŵakayima dankha kumufufuza mulandu chifukwa cha muliri wa COVID-19

5. June 8, 2020

   Ŵakambiraso kufufuza mulandu wake

Nga ni Aleksey, nase tili na chigomezgo chose kuti Yehova walutilirenge ‘kulongora nkhongono zake’ pa wose awo ŵakutambuzgika.—2 Midauko 16:9.