Khoti la Leninskiy lipelekenge chigamuro chake sonosono pa mulandu wa Mubali Anatoliy Vilitkevich. a Wakwimira boma pa milandu wachali wandapemphe chilango icho wangapika.

Anatoliy Vilitkevich

• Chaka cha kubabikira: 1986 (ku Chigaŵa cha Khabarovsk)

• Mbiri yake: Wakugwira ntchito ya ukalipentara. Wakatorana na muwoli wake Alyona mu 2008. Ŵakutemwa kuluta ku malo agho ŵakugona mu mathenti na kutembeya

  Ŵapapi ŵake ŵakamovwira kuti wambe kutemwa Mlengi kufuma waka apo wakaŵa muchoko. Iyo wakakondwa chomene na fundo yakuti ŵanthu ŵazamukhalanga lumoza na vinyama kwambura kupwetekana. Wakabatizika mu 1997 apo wakaŵa na vyaka 11

Mubali Anatoliy Vilitkevich wakaŵikika mu gulu la ŵanthu awo boma la Russia likuti ŵakuchita vinthu vyakofya pa August 8, 2018. Iyo pamoza na Mubali Dennis Christensen, ŵakaŵa Ŵakaboni ŵa Yehova ŵakwamba kujalirika mu jele Khoti Likuru la ku Russia lati lakanizga milimo yithu mu April 2017.

Ŵakufufuza milandu ŵakaŵika mwakubisilizga makamera mu nyumba ya Anatoliy na muwoli wake Alyona. Pamanyuma ŵamazaza aŵa ŵakati Anatoliy wali na “mulandu” chifukwa wakadumbiskananga fundo za mu Baibolo na ŵabwezi ŵake. Pasono ŵakuti wali na mulandu wakulongozga milimo ya gulu ilo likuchita vinthu vyakofya.

Apo ŵapolisi ŵakamutoranga Anatoliy na kuluta nayo, yumoza wawo wakayowoya mwamsinjiro kwa Alyona kuti “uŵenge munyake nthena wapenjerathu mwanalume munyake.” Anatoliy wakuti apo ŵakamufumbanga mafumbo “wakasuzgika chomene maghanoghano ndipo wakafipanga mtima. Ŵamazaza aŵa ŵakaniphalira kuti para nkhuleka kuzomera kuti nili na mulandu, mbwenu muwoli wane na awo tikachitiranga lumoza maungano mu nyumba mwane ŵasanganenge na masuzgo ghakusazgikira. Kanandi waka, ŵakaniphaliranga kuti muwoli wane nayo ŵamujalirenge mu jele. Pa nyengo zanthena izi, nkhalombanga kwa Yehova na kumupempha kuti wanipe mtende wa mu mtima.”

Anatoliy ŵakamusunga mu jele kwa myezi yakujumpha yiŵiri, wakakhala pa jele la panyumba myezi pafupifupi 9, ndipo kwa nyengo yakujumpha chaka chimoza na hafu wakakanizgika kwenda kufuma mu chigaŵa icho wakukhala. Apo wakaŵa mu jele, wakalembanga mu notibuku viyelezgero vya mu Baibolo vya ŵanthu awo nawo ŵakatambuzgikanga. Iyo wakuti: “Nkhakumbuka kuti Yehova wakakanizga yayi kuti ivi vileke kuŵachitikira, kweni pa nyengo yimozamoza wakaŵataya yayi. Ivi vikanikhozga chomene ndipo vikanovwira kumanya kuti Yehova wachitenge mwakuyana waka kwa ine. Chakuzirwa nkhulutilira kuŵa wakugomezgeka.” Makalata agho muwoli wake wakamulemberanga nagho ghakamukhozga chomene. Anatoliy wakuti: “Mu yimoza mwa makalata agho wakanitumira pakwamba, Alyona wakaŵikamo vithuzi vinandi vya ŵabwezi ŵithu. Nyengo yiliyose para nawona vithuzi ivi, nkhayezganga kukumbuka chinthu chakukondweska icho chikachitika apo nkhaŵa na munthu uyo tayimira lumoza pa chithuzi. Ivi vikanovwira kujipulika nga kuti nili waka nawo lumoza ŵabwezi ŵane.”

Viyelezgero vya kulutilira kuŵa ŵakugomezgeka vya nga ni Anatoliy na Alyona vikutikhozga tose. Tikukondwa kumanya kuti ŵabali na ŵadumbu ŵithu ku Russia ŵakulutilira kukhora mwauzimu nangauli ŵakutambuzgika chomene. Nakuti tikuwonga chomene Yehova chifukwa cha kupulika malurombo ghithu agho tikulombera ŵabali aŵa.—2 Ŵakorinte 1:11.