Pa February 22, 2023, Mubali Andrey Andreyev wakafumiskika mu jele ku Russia pamanyuma pakuti wakhalamo vyaka vyakujumpha vitatu kufuma apo wakakakikira.

Andrey wakakakika pamoza na ŵabali ŵanyake ŵanandi pamanyuma pakuti ŵapolisi ŵasecha nyumba za Ŵakaboni ŵa Yehova kweniso kuŵafumba mafumbo ku Kursk pa October 16, 2019. Wakakhala myezi pafupifupi 20 mu selo, pamanyuma ŵakamujalira mu jele pa June 3, 2021.

Apo wakaŵa mu jele chifukwa cha chipulikano chake, Andrey wakachitanga chilichose icho wangafiska kuti wapwelelere mwauzimu muwoli wake Svetlana, na ŵana ŵake ŵasungwana ŵaŵiri, Anzhelika na Albina. Kwizira mu makalata, wakalembangamo fundo zinandi zakukhozga kweniso wakalemba nkhani ya ukwati ya Anzhelika, uyo wakatengwa apo iyo wakaŵa mu jele. Anzhelika wakayowoya kuti: “Ŵakalemba nkhani yiwemi chomene, yakukhozga. Yikakondweska waliyose nanga mbalendo awo ŵakachemeka . . . ndipo tikajipulika nga tili nawo lumoza pa zuŵa la ukwati wane.”

Kuti ŵalute kukamuwona Andrey, mbumba yake yikendanga pa basi kwa maora 8 kuluta pera. Nangauli ulendo ukaŵanga wakuvuska, kweni Svetlana wakayowoya kuti iyo na ŵana ŵake ŵasungwana ŵakawovwirikanga na Ŵakaboni ŵanyawo awo ŵakaŵapanga malo ghakugona, chakurya, na ndalama yakwendera pakuluta na kuwera. Ŵanji ŵakafikanga nanga mpha kukhala pa mzere usiku wose na chilato chakuti ŵamuwone Andrey.

Nangauli ku jele ŵakamuchitiranga nkhaza, kweni mwauzimu Andrey wachali wa nkhongono. Chifukwa chakuti wakaŵa na makhaliro ghawemi gha Chikhristu, ŵalaraŵalara ŵa jele ŵakamuchindikanga, ndipo ŵakamupa mwaŵi wakusazgikira wakuti ŵanthu ŵanandi ŵangiza kuzakamuwona. Nangauli wakakakika, Andrey wakayowoya kuti: “Nilije chakusingo na munthu, ukali, nesi thinkho na waliyose. Na wovwiri wa Chiuta, nalutilira kuŵa wakugomezgeka ndipo nili wakukondwa.” 

Tili na chigomezgo chose kuti Yehova wamutumbikenge chomene Andrey chifukwa waŵikapo mtima kulongora mikhaliro ya Chikhristu.—1 Yohane 4:16.