Andrey Gubin

• Chaka cha kubabikira: 1974 (mu Msumba wa Saran, Kazakhstan)

• Mbiri yake: Wali na mukuru wake kweniso mudumbu wake. Apo wakaŵa munyamata wakagwiranga ganyu ya kunozga na kupanga maloko para waŵeruka ku sukulu kuti wawovwire mbumba yakwake. Kufuma apo wakamba kugwira ntchito ya kwendeska mashini ghakurughakuru ku kampani ya vya kuzenga. Wakutemwa maseŵero, kulemba mapowemu, na kulizga vyakwimbira sumu

• Kufuma waka apo wakaŵa mwana, wakasuzgikanga maghanoghano chifukwa cha vinthu viheni na vyambura urunji ivyo vikuchitika mu charu. Wati wamba kusambira Baibolo wakasanga mtende wa mu mtima kweniso wakamanya chifukwa icho tiliri na umoyo. Layizgo ilo lili mu Baibolo lakuti Chiuta wazamwiziska urunji na mtende pa charu, likamupangiska kuti wajipeleke kwa Yehova Chiuta. Wakabatizika mu 1991 apo wakaŵa na vyaka 17. Wakatorana na muwoli wake, Tatyana, mu 2007. Wakasamira ku Birobidzhan mu 2011

Pa February 12, 2020, ŵa Federal Security Service (FSB) ŵakamba kumufufuza mulandu Mubali Andrey Gubin. Pa September 17, 2020, ŵakamba kumuzenga mulandu.

Mulandu wake ngumoza mwa milandu 19 iyo ŵamazaza ŵali kupa ŵabali na ŵadumbu ŵithu ku Chigaŵa cha Jewish Autonomous. Milandu iyi yikamba apo ŵamazaza ŵakasecha nyumba za Ŵakaboni pa kusecha uko kukuchemeka kuti “Judgment Day.” Pa May 17, 2018, ŵapolisi 150 ŵakasecha nyumba 22 za Ŵakaboni ŵa Yehova. Ŵamazaza aŵa ŵakapoka vinthu nga makadi gha ku banki, ndalama, vithuzi, makompyuta, na mafoni.

Ŵamazaza ŵali kujara ma akaunti gha ku banki gha Andrey na Tatyana. Ivi vyapangiska kuti ŵasuzgikenge kusanga ndalama zakuti ziŵawovwirenge pa umoyo wawo wa zuŵa na zuŵa. Pasono pajumpha myezi kufuma apo ŵakamba kuŵapa mulandu uwu, ndipo vyakhwaska chomene umoyo wa Tatyana. Ndipouli, banja ili likusanga nkhongono chifukwa cha kuŵikapo mtima kuŵerenga Baibolo nyengo zose. Iwo ŵawovwirika chomene na ulongozgi wa mu Baibolo wa umo ŵangachitira kuti ŵazizipizge nyengo zakusuzga izo ŵakujumphamo.

Pasono Andrey wakumugomezga chomene Yehova kweniso gulu lake chifukwa cha wovwiri uwo wakupokera kufuma ku ŵabali na ŵadumbu ŵake. Mwachiyelezgero, zuŵa linyake Andrey wakamba kwenjerwa chifukwa cha umo vinthu viliri. Iyo wakaphalirako mubali munyake uyo nayoso wakupika mulandu wakuyana waka umo wakujipulikira. Mubali uyu wakamba dankha kumuphalira kuti ntchakawiro kuti munthu wafipe mtima para wakujumpha mu nyengo zanthena izi. Kufuma apo, mubali uyu wakamukumbuska Andrey kuti Yesu wakawonanga kuti kutambuzgika chifukwa cha zina la Yehova ni mwaŵi. Andrey wakuti: “Nkhati napulika fundo izi, mtima wane ukawelera m’malo. Naŵikapo mtima kulutilira kuchita khumbo la Adada ŵithu.”

Tikulomba kuti mphanyi Andrey na Tatyana ŵalutilira kusanga nkhongono mu Mazgu gha Chiuta kweniso ŵabali na ŵadumbu ŵithu. Tikugomezga kuti “awo ŵakopa Chiuta waunenesko vinthu viŵayenderenge makora.”—Mupharazgi 8:12.