AUGUST 3, 2021
RUSSIA

Mubali Andrey Okhrimchuk Wakuthemba Yehova Kuti Wamupe Nkhongono

JULANI

Nyengo

August 2, 2021

Khoti la Leninskiy ilo lili ku Rostov-on-Don likati Mubali Andrey Okhrimchuk wali na mulandu. Khoti ili likapeleka chilango chakuti waleke kusangikaso na mulandu kwa vyaka vinayi. Ulendo uwu ŵakamujalira mu jele yayi
April 5, 2021

Khoti likamba kutegherezga mulandu wake
October 29, 2020

Wakamba kupika mulandu. Ŵakati wali na mulandu wakuchitako maungano gha gulu la chisopa ilo ndakukanizgika kweniso kukhozgera milimo ya gulu ilo likuchita vinthu vyakofya
May 22, 2019

Ŵamazaza awo ŵakavwara vyakujijara kumaso ŵakasecha nyumba ya Andrey na galimoto yake mulenjilenji

Vyakukhwaskana na munthu uyu

Andrey Okhrimchuk

Chaka cha kubabikira: 1979 (Korosten, Ukraine)

Mbiri yake: Wakasambira vya umekaniki ndipo wakaŵa injiniya. Wakaŵa msilikari pambere wandaŵe Kaboni wa Yehova

Iyo na muwoli wake Yekaterina, uyo ŵakatorana mu 2006, wose ŵakakhorwa na kufiskika kwa mauchimi gha mu Baibolo. Ŵakabatizika mu 2007. Ŵali na mwana yumoza mwanakazi

Ivyo Wakayowoya

Kasi ubwezi winu na Yehova wakhora wuli mu nyengo zakusuzga izi?

Nkhukayika usange natenge nifiskenge kuzizipizga viyezgo vyose ivi kwambura wovwiri wa Yehova. Pa umoyo wane nindalombepo maulendo ghanandi chomene nga umo nachitira pa nyengo iyi. Nkhamuphaliranga Yehova ivyo nkhufipa navyo mtima, kumupempha kuti wanovwire kuŵa na chipulikano chakukhora kweniso chikanga kuti nileke kopa chilichose panji munthu waliyose. Nkhajipulikanga kuti Yehova wakupulika malurombo ghane ndipo chilichose chili mu mawoko ghake.

Ntchivichi chikumovwirani kuti mulutilire kugomezgeka kwa Yehova apo mukusangana na viyezgo vyose ivi?

Nkhukumbuka ivyo lemba la Yohane 6:67, 68 likuyowoya. Pa lemba ili, Yesu wakafumba ŵapositole ŵake usange nawo ŵakukhumba kumuleka, ndipo Petrosi wakazgora kuti: ‘Tilute tiye kwa njani?’ Naneso ndimo nkhujipulikira. Nilute, niye kwa njani? Ni Yehova pera uyo wali na Mazgu gha umoyo wamuyirayira, ndipo ndiyo yekha uyo wangawezgerapo urunji wenecho. Lemba la Yesaya 30:15, nalo lanovwira chomene. Para nasangana na masuzgo agho palije icho ningachitapo, lemba ili likunovwira kuti mtima wane uŵe m’malo kweniso kuti nithembenge chomene Yehova.

Kasi mungaŵaphalirako vichi awo ŵakunozgekera kukumana na nthambuzgo munthazi?

Kujithemba yayi. M’malo mwake, pemphani Yehova kuti wamovwirani muŵe na chipulikano chakukhora, muŵe ŵakukhwima mtima kweniso ŵachikanga. Khozgani ubwezi winu na ŵabali na ŵadumbu mwakuti para vinthu vyasuzga, muzakaŵe na munthu wakuti mungamuphalirako umo mukujipulikira.

Chipulikano chakukhora icho ŵali nacho ŵabali na ŵadumbu ŵithu ku Russia ntchiyelezgero chiwemi kwa tose. Tikumanya kuti Andrey na mbumba yake ŵalutilirenge kuzizipizga nthambuzgo iyi apo ŵakulutilira kuthemba Adada ŵithu ŵa kuchanya, Yehova.—Salimo 37:5.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI