Khoti la Zheleznodorozhny ku Krasnoyarsk lipelekenge chigamuro chake sonosono apa pa mulandu wa Mubali Andrey Stupnikov. a Uyo wakwimira boma pa milandu wachali wandapemphe chilango icho mubali uyu wangapika.

Andrey Stupnikov

• Chaka cha kubabikira: 1973 (ku Norilsk, Chigaŵa cha Krasnoyarsk)

• Mbiri yake: Wakasambira vya uinjiniya wakuwona vya mafuta na gas. Wakatorana na Olga mu 1993. Wose ŵakutemwa kupanga vinthu vya luso na kuchezga kuwaro kwa nyumba yawo

  Kufuma pa unyamata, wakakhumbanga kumumanya makora Chiuta. Wakaŵako pa nyengo iyo ku Chechnya kukaŵa viwawa ivyo ŵanthu ŵakakomananga pa nkhondo yakwamba yakuchemeka Chechen. Wakajifumbanga chifukwa icho vinthu viheni vikuchitikira ndipo wakakhumbanga kumanya ivyo wangachita kuti wabisame kwa Chiuta. Iyo na muwoli wake Olga ŵakamba kusambira Baibolo na Ŵakaboni ŵa Yehova. Ŵakazizwa kumanya kuti mauchimi gha mu Baibolo ghakufiskika nadi ndipo ulongozgi uwo ukusangika mu Baibolo nawo ngwakovwira chomene kuzizipizga masuzgo ghakupambanapambana

Pa July 3, 2018, ŵa Federal Security Service (FSB) ŵakamukaka Mubali Andrey Stupnikov pa Chiŵanja cha ndege cha Krasnoyarsk. Iyo ni Kaboni wakwamba kufuma ku Krasnoyarsk uyo wali kukakika na kupika mulandu. Zuŵa lakulondezgapo, Khoti la Zheleznodorozhny ku Krasnoyarsk likati Mubali Andrey ŵamusunge mu jele.

Muwoli wa Andrey, Olga, wakamutumiranga makalata kuti wamukhozge. Ndipouli, pati pajumpha nyengo Andrey wakaleka kupokera makalata ghakufuma kwa muwoli wake, ndipo ivi vikamufipiska mtima chomene. Nakuti Andrey wakasuzgika chomene maghanoghano apo kukiza mwanalume munyake uyo wakamufumba kuti: ‘Kasi ukuwona kuti ntchivichi chachitikira muwoli wako? Ukumanya nthena?’ Mu kuluta kwa nyengo, Andrey wakamanya kuti ŵalaraŵalara ŵa jele ŵakabisiranga dala makalata ghakufuma kwa muwoli wake. Andrey wakuti: “Ŵakaniphalira kuti ningaweleraso kwa muwoli wane mwaluŵiro chomene para ningapulikira waka ivyo ŵaniphalira panji kuzomera kuti ndine wakubuda.” Andrey wakathemba Yehova ndipo wakalutilira kuŵa wakugomezgeka. Wati wasungika mu jele kwa myezi 8, ŵakamufumiska na kumutuma pa jele la panyumba ilo wakakhalapo kwa myezi yinayi.

Pa July 2, 2019, Andrey wakafumiskika pa jele la panyumba. Ŵakamukanizga kugwiliskira ntchito intaneti panji kupokera na kutumizga chinthu chilichose. Ŵamazaza ŵali kumuŵikiraso mphaka pa ŵanthu awo wakwenera kuyowoyeskana nawo.

Apo mulandu wake ukulutilira, Andrey wakuŵika mtima pa ubwezi wake na Yehova. Iyo wakuyowoya mwakusimikizga kuti: “Nkhunotha kuti nkhumumanya Yehova ndipo iyo wakuŵa nane pafupi nyengo zose.”

Tikukhozgeka chomene na chiyelezgero chiwemi icho Andrey wakulongora pa kulutilira kuthemba wovwiri wa Yehova.—Salimo 28:7.