Pa February 2, 2021 a, Khoti la Birobidzhan ilo lili ku Chigaŵa cha Jewish Autonomous lizamupeleka chigamuro chake pa mulandu wa Mubali Artur Lokhvitskiy. Wangazakeruzgika kuti wakagwire jele vyaka vinayi.

Artur Lokhvitskiy

• Chaka chakubabikira: 1986 (ku Belgorodskoye, ku chigaŵa cha Jewish Autonomous)

• Mbiri yake: Adada ŵake ŵakafwa apo wakaŵa na vyaka 7. Wakasambira ntchito ya vyamagesi kweniso ntchito yakovwira ŵanthu para kwabuka moto. Mubali uyu wali kupokerapo vyawanangwa vinandi chifukwa cha kulimbikira ntchito.

  Apo Mubali Artur wakaŵa mwana, amama ŵake ŵakamusambizga kuti watemwenge Yehova. Mu 1998, apo wakaŵa na vyaka 11, wakabatizika na kuŵa Kaboni wa Yehova. Ŵakatorana na Anna, mu 2018. Iwo ŵakutemwa kwenda na kuwona vilengiwa.

Mu May 2018, pakati pajumpha myezi yitatu kufuma apo Artur na Anna ŵakatolerana, ŵapolisi ŵakasecha nyumba yawo. Kusecha uku ŵakakuchemanga kuti, “Zuŵa la Cheruzgo,” ndipo pa zuŵa ili ŵapolisi 150 ŵakasecha nyumba za Ŵakaboni ŵa Yehova 22. Ŵakasechaso nyumba ya Mudumbu Irina, awo mbamama ŵake ŵa Artur. Pa July 31, 2019, ŵapolisi ŵa FSB ku Birobidzhan ŵakati Artur wali na mulandu wakuchita vinthu mwakutalulira. Ndipo Anna na Irina, waliyose ŵali kumujulira mulandu wake.

Mulandu uwu wapangiska kuti banja ili lisangane na suzgo la ndalama. Ŵalara ŵa boma ŵali kujara akaunti ya ku banki ya Artur kuti waleke kutora ndalama. Kweniso abwana ŵake ŵakuti ŵamulekeskenge ntchito.

Pasono banja ili likukhala umoyo wakusuzga chomene chifukwa ŵachali kufufuza za mulandu wake. Artur wakulongosora kuti: “Umoyo withu wasintha chomene. Ntchakusuzga chomene kughanaghanira ivyo tingachita kuti vitovwire kwa sabata yimoza (panji nanga lingaŵa zuŵa limoza.) Ŵapolisi ŵakutichema panyengo yiliyose waka apo iwo ŵakhumbira. Ntheura tawona kuti ntchiwemi kughanaghanira waka ivyo tingachita zuŵa ilo.”

Artur na Anna ŵakuwonga chomene ŵabali na ŵadumbu chifukwa cha wovwiri uwo ŵakuŵapa. Artur wakuti: “Ŵabali ŵakutovwira chomene kuti tileke kufipa mtima kweniso kuti tiŵe paubwezi wakukhora na Yehova. . . Tikutondeka na kuyowoya umo tikujipulikira chifukwa cha kukondwa pakuŵa ŵamoza mwa ŵanthu ŵa Yehova, kweniso kuŵa na mwaŵi wakuvikilira zina la Yehova mu khoti! Uwu mbukaboni wakukwana wakuti Yehova wakuŵaleka ŵekha yayi awo ŵakumuteŵetera!”

Mubali Lokhvitskiys nayo wakusanga nkhongono kweniso chikanga chifukwa cha kulomba na kuŵerenga Baibolo nyengo zose. Kweni nyengo zinyake ntchipusu yayi kuchita nthena. Pamanyuma pa “Zuŵa la Cheruzgo,” Artur wakuti, “Tikaŵavya Baibolo panji buku lililose lakulongosora Baibolo.” Artur wakafipa mtima chomene. Iyo wakajifumbanga kuti, kasi banja lane liryenge wuli chakurya chauzimu? Kweni nyengo yichoko waka wakakumbuka fundo yakuzirwa chomene, yakuti: “Ŵapolisi ŵa FSB ŵandatiphange yayi lurombo. Ntheura nyengo yeneyiyo tikalomba. Lurombo lukatovwira chomene.”

Yehova wakazgora lurombo lwawo mwaluwiro chomene, wakaŵapa chakurya chauzimu, ndipo ŵakambaso kuchita vinthu vyauzimu mwakukhazikika. Artur wakuti: “Tikuyezgayezga chomene kuti nyengo zose tichitenge kusopa kwa mbumba, kunozgekera maungano, kweniso kuŵerengera lumoza Baibolo nga banja. Ivi vyatovwira kuti titemwanenge chomene nga banja, kweniso kuwona umo Chiuta wakutovwilira pa umoyo withu, na kulutilira kuwona vinthu mwakwenelera.”

Chinthu chinyake icho chaŵawovwira chomene padera pa kusambira Mazgu gha Chiuta, nkhughanaghanira vitumbiko vyamunthazi. Artur wakuti: “Tikamba kughanaghanira za chigomezgo chithu cha munthazi, tikajitoranga nga kuti tili mu charu chiphya.” Iyo wakulutizga kuti: “Tikukhumba kuti tizakagwireko ntchito yakutozga charu kweniso yakuzenga. Ivi vikutikhozga chomene.”

Apo Artur na Anna ŵakulindilira zuŵa ilo ŵazamuwombokwera ku masuzgo ghawo, nyengo zose ŵakughanaghanira ivyo lemba la Ŵahebere 13:6 likuyowoya. Lemba ili likuti: “Yehova ni movwiri wane, nopenge chara. Kasi munthu wangachitachi kwa ine?” Artur wakuti: “Mbunenesko kuti ŵalara ŵa boma ŵangatipoka wanangwa wakuwungana na ŵabali ŵithu, panji wanangwa wakuŵira lumoza na muwoli wane. Kweni ŵangatipoka yayi wanangwa wazirwa chomene uwo tili nawo, wa kuŵa paubwezi na Yehova, lurombo, kweniso chigomezgo chithu cha munthazi. Ndipo tikwenera kukumbuka fundo iyi nyengo zose.”