Ŵabali ŵithu ŵachinyamata ŵaŵiri ku Russia, Mubali Yegor Baranov na Mudumbu Darya Dulova, ŵalongora chikanga apo ŵakulindilira kuti milandu iyo ŵali kuŵapa yeruzgike ndipo panji ŵangazakapika chilango chakuti ŵakakhale mu jele nyengo yitali. Pasono ŵakuŵasunga dankha kulindilira kuti mulandu wawo weruzgike, ndipo Mubali Baranov wali na vyaka 19. Mudumbu Dulova wakaŵa na vyaka 18 apo ŵamazaza ŵakiza kuzakasecha nyumba iyo wakukhala. Mubali na mudumbu uyu, ndiwo mbana ŵachoko chomene pa ŵabali na ŵadumbu ŵakujumpha 380 awo ŵakuŵapa mulandu chifukwa cha chipulikano chawo ku Russia.

Mubali Baranov wakhala mu jele umo ŵakumusunga kufuma pa May 27, 2020. Mudumbu Dulova wakulindilira ivyo khoti leruzgenge pa milandu yiŵiri yakupambana. Nangauli ŵakusangana na masuzgo ghose agha, kweni wose ŵaŵikapo mtima kulutilira kuŵa ŵakugomezgeka kwa Yehova.

Ŵa Federal Security Service (FSB) awo ŵakayegha futi, ŵakasecha nyumba iyo Mubali Baranov wakakhalanga na amama ŵake pa May 27. Zuŵa leneliro, Mweruzgi Aleksey Shatilov wakadumura kuti mubali uyu ŵamujalire mu jele chifukwa cha kuŵa “yumoza wa ŵalongozgi” wa Ŵakaboni ŵa Yehova mu chigaŵa ichi.

Pa nyengo yakofya iyo ŵamazaza aŵa ŵakasechanga nyumba iyo wakakhalanga, Mubali Baranov wakati mtima wake ukakhala m’malo wati walomba kwa Yehova. Iyo wakuti, “Yumoza wa awo ŵakasechanga wakawona kuti ine nkhuchita vinthu nga ni para namanyanga kale kuti iwo ŵizenge.”

Mubali Baranov wakuti kanandi wakujikumbuska kuti “usange Yehova wazomerezga kuti nikumane na chiyezgo ichi, ndikuti wakumanya kuti ningazizipizga.” Wakutiso: “Malurombo ghakufumira pasi pa mtima kweniso mzimu utuŵa, vikunovwira kuti nileke kopa. Nakuti nili na chigomezgo chose kuti nilije mulandu. Nili na njuŵi yituŵa, ndipo nkhutambuzgika chifukwa cha chipulikano chane.”

Mubali Baranov wakusimikizga kuti wakuchita wofi yayi ku jele uko ŵakumusunga. Ŵanyake awo ŵakukhala lumoza mu jele ŵakumupa ntchindi ndipo ŵakumutora nga ni munung’una wawo. Mubali Baranov wakuti, “Ŵakupulikiska kuti ine nkhwenera kuŵa mu jele yayi.”

Pa August 1, 2018, ŵamazaza ŵakasecha nyumba iyo Mudumbu Dulova wakukhala na amama ŵake. Mudumbu Dulova wakuti nangauli ivyo ŵakachita ŵamazaza aŵa pa kusecha kweniso kumukaka vyakhwaska chomene maghanoghano ghake, kweni wachali na chipulikano chakukhora. Iyo wakuti, “Naŵikapo mtima kulutilira kuŵa wakugomezgeka kwa Yehova. Niteŵeterenge Yehova umoyo wane wose, vilije kanthu kuti kwali nikumanenge na masuzgo wuli.”

Mulandu wa Mudumbu Dulova ukamba kweruzgika mu September 2019, na Khoti la mu Msumba wa Karpinsky mu Chigaŵa cha Sverdlovsk. Zuŵa linyake apo ŵakapulikizganga mulandu wake, Mudumbu Dulova wakaphalira khoti kuti ntchakawiro kuti ŵanthu ŵaphalirengeko ŵanyawo vinthu viwemi ivyo ŵakumanya. Iyo wakalongosora kuti: “Mwachiyelezgero, ine nkhumanya kuti sonosono apa Chiuta wazgorenge charu chapasi kuŵa paradiso, ndiposo kuti kuzamuŵa waka masozi gha chimwemwe pera. Kasi vinthu vyakukondweska nga ni ivi wamunthu ungakhala waka navyo chete kwambura kuphalirako ŵanyako?”

Nangauli wakalongosora vifukwa vyakupulikikwa makora mwachikanga, pa January 27, 2020 ŵakati wali na mulandu. Mudumbu Dulova wakapika chilango chakuti wakhale chaka chimoza kwambura kusangikaso na mulandu. Uyo wakamwimiranga pa mulandu wakachita apilu chigamuro ichi.

Pa August 6, 2020, Khoti la ku Chigaŵa cha Sverdlovsk likasuska ivyo khoti lakwamba likeruzga pa mulandu wa Mudumbu Dulova. Mulandu uwu ukaweleraso ku Khoti la mu Msumba wa Karpinsky kuti ukeruzgikeso na mweruzgi munyake. Pasono zuŵa ilo ŵazamupelekera cheruzgo likumanyikwa yayi. Apo wakulindilira cheruzgo cha mulandu uwu, wakuyezgayezga kupeleka ukaboni wakuti iyo ngwambura kwananga pa mulandu unyake uwo ukukhwaska iyo, amama ŵake, na Ŵakaboni ŵanyake ŵatatu.

Mubali Baranov na Mudumbu Dulova ŵasambira vinandi ku viyezgo ivyo ŵakusangana navyo.

Mudumbu Dulova wakulongosora ivyo vyamovwira: “Kuti muŵe ŵakukhwima mwauzimu, mukwenera kuŵerenga Baibolo nyengo zose, kunozgekera maungano gha mpingo, na kusambira sumu zithu za Ufumu. Nyengo zose mutangwanikenge na kughanaghanirapo fundo za mu Baibolo, ivi vingamovwirani kuti muleke kwenjerwa chomene kweniso kopa vinthu vyamunthazi.”

Mubali Baranov wakuti: “Kuti wamunthu uzizipizge masuzgo ghanthena agha, ukwenera kuŵa paubwezi wakukhora na Chiuta. Kumalira nyengo pa vinthu vyambura kuzirwa yayi. Sono nthena ndiyo nyengo yiwemi yakuti mukhozge ubwezi winu na Yehova.”

Mu Baibolo muli viyelezgero vinandi vya umo Yehova wakawovwiliranga ŵachinyamata ŵakugomezgeka kuti ŵaŵe ŵakukhora kweniso ŵachikanga. Tikumanya kuti walutilirenge kovwira ŵabali ŵithu ŵachinyamata awo ŵakutambuzgika ku Russia na vigaŵa vinyake vya pa charu chapasi.—1 Samuyeli 1:20; 16:18; 2 Mathemba 5:1-3; Daniyeli 1:14-17; 3:17-27.