Pa September 2, 2020, * Khoti la mu Msumba wa Berezovsky ilo lili ku Chigaŵa cha Kemerovo lizamupeleka chigamuro chake

Kugwira jele vyaka 6 na hafu

Sergey Britvin

• Chaka cha kubabikira: 1965 (ku Chigaŵa cha Kemerovo)

• Mbiri yake: Kwa vyaka vinandi wagwiranga ntchito ya kwendeska mathirakitara na mathiraki. Wakaleka ntchito iyi chifukwa cha ulwari. Wakutemwa maseŵera

• Mu 1992, wakatorana na Natalya. Wakamba kusambira Baibolo mu 1995 wati wamanya ivyo Chiuta wakulayizga pa nkhani ya chiwuka. Pati pajumpha vyaka, Natalya nayo wakaghanaghana vyakwamba kusambira Baibolo. Wakakhorwa na ivyo Sergey wakagomezganga kweniso wati wawona umo wakasinthira nkharo yake yiheni.

Vadim Levchuk

• Chaka cha kubabikira: 1972 (ku Chigaŵa cha Kemerovo)

• Mbiri yake: Wakalelekera mu banja ilo likasopanga yayi. Wakagwira ntchito ku mgodi kwa vyaka 14

• Mu 1992, wakamba kusambira Baibolo. Wakatorana na Tatiana mu 1997, ndipo ŵali na ŵana ŵanalume ŵaŵiri. Banja lake lose likuchindika Baibolo. Wose ŵakutemwaso maseŵero na kuchita ntchito zinyake.

Pa July 22, 2018, ŵa Federal Security Service (FSB) ŵakasecha mwakuchichizga nyumba 8 za Ŵakaboni ŵa Yehova mu Msumba wa Berezovsky. Paumaliro, Mubali Britvin na Levchuk ŵakaŵakaka na kuluta nawo kuti ŵakaŵafumbe mafumbo. Ivi vyati vyachitika, Khoti la Central District ku Kemerovo likati ŵabali wose ŵaŵiri ŵakaŵasunge mu jele apo ŵakulindilira kuti mulandu wawo uzakeruzgike. Ŵakakhala mu jele pafupifupi chaka chimoza na hafu. Pa December 25, 2019, ŵabali aŵa ŵakaŵafumiska na kuŵaŵika pa jele la panyumba, ndipo ŵachali pa jele ili m’paka sono.

Mubali Britvin na Levchuk mbamoza mwa ŵabali 5 ku Chigaŵa cha Kemerovo, awo ŵakuti ŵali na milandu chifukwa chakuti waka Mbakaboni ŵa Yehova. Nase tikuŵafipira mtima na kuŵalombera ŵabali na ŵadumbu ŵithu wose awo ŵali mu jele ku Russia. Nyengo zose tikuŵikapo mtima kulondezga mazgu gha pa Ŵahebere 13:3 agho ghakuti: “Kumbukani awo ŵali mu jele nga ni para namwe mwakakika pamoza nawo, ndiposo awo ŵakuyuzgika, pakuti namwe muchali mu thupi.”