Pa June 14, 2024, Mubali Denis Antonov na Mubali Aleksandr Korolev ŵali kufumiskika mu jele la ku Molochnitsa ku Russia. Ŵabali wose ŵaŵiri ŵakasangika na mulandu pa August 25, 2022, ndipo ŵakapika chilango cha kugwira jele kwa vyaka viŵiri. Ŵabali aŵa ŵafumiskika chifukwa vyaka ivyo khoti likaŵapa ndivyo ŵakaŵa kuti ŵakakhala kale ku jele lakulindilirako awo mulandu wawo underuzgike.

Olga, uyo ni muwoli wa Denis wakayowoyapo ivyo vikaŵawovwira pa nyengo iyo Denis wakaŵa ku jele. “Tikakhozgananga kwizira mu makalata kweniso mavesi agho tikalembangamo. Vesi linyake ilo likatovwira chomene ni ilo likusangika pa Mupharazgi 8:12, apo Solomoni wakalemba kuti: ‘Nkhumanya kuti awo ŵakopa Chiuta waunenesko vinthu viŵayenderenge makora.’ Vesi ili likatovwira kumanya kuti para tilutilirenge kuteŵetera Yehova na kuleka kugongowa, iyo watipenge nkhongono kuti tizizipizge.”

Mu mazgu ghake ghaumaliro mu khoti pambere ŵandapike chilango, Aleksandr wakayaniska nthambuzgo iyo wakukumana nayo na iyo ntchimi Daniel yikakumana nayo. Iyo wakayowoya kuti: “Nangauli ŵakamofya kuti ŵamukomenge, kweni Daniel wakalutilira kulomba kwa Yehova Chiuta chifukwa wakaŵa na chipulikano chakukhora. Nilutilirenge kulomba Chiuta kuti wanipe chipulikano nga icho Daniel wakaŵa nacho, icho palije nthambuzgo iyo yingachimazga.”

Tikukondwa nawo lumoza ŵabali aŵa apo sono ŵali lumoza na mabanja ghawo. Ivyo vyaŵachitikira vikutikumbuska layizgo ilo likusangika pa Salimo 4:3 apo pakuti: ‘Manyani kuti Yehova wachitenge vinthu na wakugomezgeka wake mu nthowa yapadera. Yehova wapulikenge para tikumuchema.’