Pa July 15, 2020, Mubali Dennis Christensen ŵakamuŵikaso kachiŵiri mu selo yakuyuzgiramo ŵanthu (SHIZO). Wakhalenge mwenemumu m’paka pa July 27. Ivi vikachitika pati pajumpha waka mazuŵa ghanayi kufuma apo ŵakamufumiskira mu selo iyi. Para mubali uyu ŵangamuŵikaso mu selo iyi kachitatu, mbwenu ŵalaraŵalara ŵa jele ŵangadumura kuti “ni munthu uyo wakuswa malango ghakurughakuru gha jele” ndipo ŵangamutumizga ku selo yakofya chomene iyo nayo ŵakuyuzgirako ŵanthu (EPKT) uko wangakakhalako myezi 6. Maloya gha Mubali Christensen ghachitenge apilu pa milandu iyo ŵakuti wali kupalamura.

Ŵalaraŵalara ŵa jele ŵakumuyuzga nthena Mubali Christensen chifukwa chakuti wali na masuzgo ghanyake agho ghakumupangiska kuti chiŵe chakusuzga kugwira ntchito zinyake izo ŵakumupa. Awo ŵakulaŵilira jele ŵakukhumba kuti Mubali Christensen wagwirenge mu fakitare ya kusona malaya. Kweni mubali uyu wali makora viŵi yayi kufuma waka apo ŵakamujalira mu jele. Madokotala gha pa jele ili ghakuti Mubali Christensen wali makora waka mwakuti wangagwira ntchito chikuru wakupumura na kuchita maseŵero ghakukhozga thupi. Ndipouli, dokotala munyake uyo wakugwira ku jele yayi, wakati Mubali Christensen wangagwira yayi ntchito chifukwa cha umo muthupi mwake muliri.

Para mukayidi ŵamujalira mu SHIZO, wakuzomerezgeka yayi kugura chakurya, kwimba panji kupokera foni, kuwonana na ŵanthu ŵanyake, panji kupokera katundu. Dango likuzomerezga kuti mukayidi uyo ŵamujalira mu selo ya SHIZO wangawonana na munthu wachisopa. Kweni Mubali Christensen wangaŵachema yayi ŵalara kuti ŵazakamwendere chifukwa chakuti Ŵakaboni ŵa Yehova mbakukanizgika ku Russia.

Nga umo tikayowoyera mu lipoti la pa June 23, Khoti la ku Lgov likeruzga kuti Mubali Christensen wafumiskike mu jele pambere nyengo yake yindakwane ndipo nyengo iyo yakhalako yakuti wakhalire mu jele walipire waka ndalama. Kweni pakati pajumpha waka mazuŵa ghachoko waka, wakwimira boma pa milandu wakachita apilu cheruzgo ichi. Vikulongora kuti ŵalara ŵa jele ŵakukolerana na wakwimira boma pa milandu kuti ŵamunangire mbiri Mubali Christensen kuti waleke kufumiskika luŵiro mu jele.

Mubali Christensen na muwoli wake, Irina, ŵachali ŵakukhora mwauzimu. Tikukhozgeka chomene kuwona umo nyengo zose Yehova wakovwilira ŵateŵeti ŵake ŵakugomezgeka, kuti ŵazizipizge mwakuzikira kweniso mwachimwemwe nanga ŵangaŵa kuti ŵali mu viyezgo vyakofya.—Ŵakolose 1:11.