Khoti la Minusinsk ilo lili mu Chigaŵa cha Krasnoyarsk, lipelekenge chigamuro chake sonosono apa pa mulandu wa Mubali Dmitriy Maslov. a

Dmitriy Maslov

• Chaka cha kubabikira: 1976 (Minusinsk)

• Mbiri yake: Wakalereka na amama ŵake, pamoza na munung’una wake kweniso mudumbu wake. Wakamalizga sukulu pa koleji yinyake iyo yikusambizga vya ulimi wa njuchi. Pasono wakugwira ntchito ya upulambara. Wakutemwa kwendeska njinga, kushuwa, na kulizga chikediyoni

  Kufuma waka apo wakaŵa muchoko, wakapenjanga mazgoro gha mafumbo ghakuzirwa chomene pa umoyo. Wakasanga mazgoro ghakupulikikwa makora, na ghakukhorweska kufuma mu Baibolo. Wakabatizika mu 1994. Wakati wachemeka kuti wakanjire usilikari, wakapempha kuti wakagwire ntchito zinyake padera pa zausilikari. Wakatorana na muwoli wake, Yuliya, mu 1997

Cha kumise pa April 19, 2019, ku Minusinsk, ŵasilikari na ŵamazaza ŵa Investigative Committee kweniso ŵa Federal Security Service (FSB) ŵakasecha nyumba 5 za Ŵakaboni ŵa Yehova. Apo ŵakasechanga, ŵakamuwiskira pasi mubali muchekuru wa vyaka 76, ivyo vikapangiska kuti wapwetekeke. Ŵabali na ŵadumbu ŵakujumpha 30 ŵakaŵakora na kuluta nawo kukaŵafumba mafumbo ndipo paumaliro ŵakaŵaleka kuti ŵalutenge. Pamanyuma ŵakati Mubali Dmitriy wali na mulandu. Ŵakumupa mulandu chifukwa waka chakuti wakaluta kukatembeya ku phiri na ŵanyake ndipo uku wakamba kuŵaphalirako vyakukhwaskana na Chiuta kweniso Baibolo.

Dmitriy, uyo pasono wakukanizgika kwenda, wakulindilira waka ivyo khoti lidumurenge. Amama ŵake, awo Mbakaboni yayi, ŵakuwona kuti mulandu uwu ngwambura kupulikikwa, ndipo vikulongolerathu kuti ŵakumuchitira waka vinthu vyambura urunji. Iwo ŵakugomezga kuti mwana wawo “wali mu chisopa icho chikuchita vinthu mwamtende chomene.”

Dmitriy wakukhozgeka kweniso kuŵa na chikanga pakumanya kuti Yehova ‘walongorenge nkhongono zake’ ku ŵateŵeti ŵake ŵakugomezgeka.—2 Midauko 16:9.