Sonosono apa Khoti la Tsentralniy Chelyabinsk, lipelekenge chigamuro chake pa mulandu wa Dmitriy Vinogradov. a

Dmitriy Vinogradov

• Chaka cha kubabikira: 1963 (ku Chelyabinsk)

• Mbiri yake: Wakalereka na amama ŵake pamanyuma pakuti nthengwa yamara na adada ŵake. Wakutemwa chomene kuseŵera chess ndipo wakazgoka nkhwantha pa maseŵero agha. Wakusambizga chess pa sukulu yinyake. Wakatorana na muwoli wake, Zhanargul, mu 1990. Ŵali na ŵana ŵanayi, ŵaumaliro ŵaŵiri ŵachali panyumba

  Kanandi wakazizwanga chifukwa icho ŵanthu ŵamahara ŵakunangira charu kweniso kupweteka ŵanyawo. Wakasanga mazgoro ghakukhorweska mu Baibolo. Wakabatizika na kuŵa Kaboni wa Yehova mu 2014

Cha kuumaliro wa 2018, ŵamazaza ŵanyake ŵaboma ŵakaphalirika kuti ŵapusikizgire kuti nga ŵakukhumba kumanya vinandi vyakukhwaskana na Baibolo ndipo ŵakayowoye na Dmitriy. Kuzakafika mu January 2020, ŵamazaza aŵa ŵakati ŵali na ukaboni wakukwana wakuti ŵangamupa mulandu. Pamanyuma pa myezi yiŵiri, ŵamazaza ŵakaluta kukasecha mu nyumba yake uku mweneko palije.

Dmitriy wakulaŵiska makora yayi kweniso wali na BP. Iyo wakuti “Ubwezi wane na Chiuta ukuthemba pa umo vinthu viliri mu thupi lane yayi, ndine wakukondwa kweniso nkhunotha kuti ningakachitira ukaboni mu khoti.”

Kanandi Dmitriy na mbumba yake, ŵakuŵazga Baibolo na kughanaghanirapo, kunozgekera makora maungano, kusangikapo kweniso kuzgorapo. Kuchita nthena kwawovwira mbumba yake kuŵa yakukolerana, kuti yiŵe paubwezi wakukhora na Yehova kweniso kunozgekera nthambuzgo. Iyo wakuti: “Chinthu chimoza icho chikutovwira chomene ni malurombo gha ŵabali na ŵadumbu ŵithu. Yehova wakupulika malurombo ghawo ndipo mbumba yane wakuyitumbika chomene.”

Tikusambira vinandi ku ŵabali na ŵadumbu ŵithu awo mwachikanga ŵakuzizipizga nthambuzgo mwachimwemwe. Para tikughanaghanira vya ŵabali na ŵadumbu ŵithu ku Russia, nase tikuyowoya mazgu gha pa 2 Ŵatesalonika 1:4 agho ghakuti: “Ntheura tikunotha mwa imwe pakati pa mipingo ya Chiuta, chifukwa cha kuzizipizga kwinu na chipulikano mu nthambuzgo zinu zose na visuzgo ivyo mukukumana navyo.”