JANUARY 21, 2021
RUSSIA
Mubali Feliks Makhammadiyev Ŵamufumiska mu Jele ku Russia Ndipo Ŵamuwezgera ku Kwake ku Uzbekistan
Pa December 31, 2020, Mubali Feliks Makhammadiyev ŵakamufumiska mu jele ku Russia. Khoti la Belyayevsky ilo lili ku chigaŵa cha Orenburg likati mubali withu uyu, wakakhale dankha ku malo uko ŵakusunga ŵanthu awo ŵakuŵawezgera ku charu chawo m’paka apo wasangirenge vikalata vyakwendera kuti ŵamuwezgere ku charu chakwake ku Uzbekistan. Ivi vikaŵa nthena chifukwa charu cha Russia chikamupoka wenekaya wake mu April 2020. Pa January 20, 2021, ŵamazaza ŵa boma ŵakamukwezeska sitima ya pamtunda kuti wawelere kukwake ku Uzbekistan. Ndise ŵakukondwa kumumanyiskani kuti pa January 21, 2021, mubali Feliks wakaŵa kuti wafika ku Uzbekistan, ndipo wakenda makora. Muwoli wake, Yevgeniya, wakadangirako kuwelera ku Uzbekistan mazuŵa ghaŵiri pambere Feliks wandanyamuke, ndipo wakamupokelera mfumu wake apo wakafikanga.
Mubali Feliks wakakhala ku Russia vyaka 18. Ndipo mu 2002 apo wakaŵa muwukirano, iyo na amama ŵake ŵakasamuka ku Uzbekistan na kuluta ku Saratov, Russia. Mu 2004, apo wakaŵa na vyaka 19, wakabatizika. Ndipo mu 2011 wakatorana na Yevgeniya.
Pa June 12, 2018, ŵapolisi ŵa FSB na ŵapolisi ŵanyake awo ŵakavwara vyakujibisa ku maso ndipo ŵakayegha vilwero ŵakasecha nyumba ya Mubali Feliks na muwoli wake Yevgeniya. Pamanyuma ŵakamukaka Mubali Feliks ndipo wakalindilira kuti ŵeruzge mulandu wake pafupifupi chaka. Lurombo lukamovwira chomene kuti wasange nkhongono zakuzizipizgira. Iyo wakalongosora kuti: “Zuŵa lililose nkhalombanga kwa Yehova kuti niŵe na mtende wa mu mtima kweniso kuti nilutilire kuŵa wakukondwa.”
Mubali Feliks Makhammadiyev, pati pajumpha pafupifupi masabata ghaŵiri kufuma apo ŵalinda ŵa jele ŵakamutimba chomene
Mubali Feliks pamoza na ŵabali ŵanyake ŵankhondi ŵakati ŵali na mulandu ndipo ŵakaŵajalira mu jele pa September 19, 2019. Khoti la apilu likati lagamura kuti ŵali na mulandu, iyo pamoza na ŵabali ŵanyake ŵanayi ŵakaŵasamuskira ku jele la ku Orenburg, pa mtunda wakujumpha makilomita 800, kutali na mabanja ghawo ku Saratov. Ndipo ŵakati ŵafika ku jele ili, ŵakaŵatimba chomene.
Panyengo yose iyo Mubali Feliks wakatambuzgikanga, wakalutilira kuŵa wakukondwa kweniso kumwemwetera nga umo ŵanthu ŵakumumanyira. Muwoli wake Yevgeniya wakati: “Mfumu wane wanikhozga chomene! Iyo wakachitanga vinthu mwantchindi na kulutilira kuzizipizga, ndipo nane wakanovwira chomene kuti nizizipizge.”
Nangauli ŵalara ŵa boma la Russia ŵakakhumbanga kuti ŵamupweteke Mubali Feliks kuti waleke kugomezgeka kwa Yehova, kweni iyo wakuti ivi vyamovwira waka kuti walutilire kuŵa wagomezgeka chomene kwa Yehova. Ivi vikutikumbuska waka ivyo vili pa lemba la Genizesi 50:20, apo Yosefe wakaphalira ŵakuru ŵake kuti: “Nangauli imwe mukakhumbanga kunichitira viheni, kweni Chiuta wakavizgora viwemi.”