Pa February 1, a 2021, Khoti la Birobidzhan ilo liri ku Chigaŵa cha Jewish Autonomous lizamupeleka chigamuro chake pa mulandu wa Mubali Igor Tsarev. Wangazakeruzgika kuti wakagwire jele vyaka vinayi.

Igor Tsarev

• Chaka chakubabikira: 1974 (ku Birakan, Jewish Autonomous Region)

• Mbiri yake: Wali na ŵadumbu ŵake ŵaŵiri. Apo wakaŵa kuti wachali pa sukulu, wakagwiranga ntchito yakuwiska makuni, yaukalipentara, kweniso ya vyamagesi kuti wapwelerenge banja lakwake. Iyo wakutemwa kuwona chilengiwa na kukora somba

• Apo wakagwiranga ntchito ya usilikati wakamba kujifumba usange umoyo uli na chandulo. Ivi vikapangiska kuti iyo na adada ŵake ŵambe kusambira Baibolo. Ndipo pamanyumba wakabatizika mu 1997. Wakatorana na Viktoriya, mu 1998. Ŵali na mwana msungwana uyo wali pa sukulu

Ŵalara ŵa boma la Russia ŵakamujulira mulandu Mubali Igor Tsarev pa July 30, 2019. Iwo ŵakuti wali na mulandu chifukwa chakusambira Baibolo na “chilato chakuti waphalirenge ŵanthu ivyo Ŵakaboni ŵa Yehova ŵakugomezga.” Ŵapolisi ŵa FSB, ŵakajambura mavidiyo gha maungano mwakubisirizga na chilato chakuti ghakaŵe ukaboni pakumuzenga mulandu Mubali Igor. Chakuzizika ntchakuti loya wakwimira boma wakapempha kuti Mubali withu uyu ŵakamweluzgire kwayekha kwambura ŵanthu ŵanandi. Loya wakwimira boma uyu wakachita nthena na chilato chakuti ŵati ŵanthu ŵangakakopeka na kuzgoka Ŵakaboni ŵa Yehova na ivyo Mubali Igor wangakayowoya. Khoti likazomerezga pempho lake.

Mubali Igor wakayowoya kuti: “Sonosono apa vinthu visinthenge chomene pa umoyo wane chifukwa cha ivyo khoti lamudumura. Nakuti khoti lasintha kale vinthu pa umoyo wane. Ntchakusuzga kuluta ku charu chinyake chifukwa khoti lili kuniphalira kuti nkhawonekerenge pafupipafupi. Kweniso abwana ŵane ku ntchito ŵakunifumba chifukwa icho khoti lili kunipira mulandu. Abwana ŵane na awo nkhugwira nawo ntchito ŵakupulikiska yayi chifukwa icho nkhutambuzgikira nthena, kweni uwemi wake ngwakuti ŵakumanya kuti Ŵankhristu ŵakutambuzgika kwamba kale.”

Tikumulombera Mubali Igor pamoza na banja lake. Tikumanya kuti Yehova waŵapenge ‘nkhongono kwizira mu mzimu wake.’—Ŵaefeso 3:16.