Khoti la Mayskiy ilo lili ku Kabardino-Balkarian Republic lipelekenge chigamuro chake sonosono apa pa mulandu wa Mubali Kirill Gushchin. Uyo wakwimira boma pa milandu wachali wandapemphe chilango icho mubali uyu wangapika.

1. May 20, 2020

   Ŵa FSB awo ŵakaŵa na futi kweniso ŵakavwara vyakujijara kumaso, ŵakamuwungilira Kirill apo wakanyamukanga kuluta ku ntchito. Ŵakamukaka na kuweleraso nayo mu nyumba yake. Iyo na muwoli wake Svetlana, ŵakaŵikika dankha ku chipinda chinyake cha nyumba yawo apo ŵamazaza aŵa ŵakasechanga nyumba. Wamazaza munyake wakaŵikiramo dala mabuku ghakukanizgika mu chipinda icho banja ili likagonanga kweniso chipinda chinyake

2. April 26, 2021

   Ŵamazaza ŵakamujulira mulandu Kirill kutolera pa ukaboni wa munthu uyo wakajambura mwakubisirizga maungano agho ŵakachitanga. Wakufufuza mulandu wakati mubali uyu wali na mulandu wa kwimba na kulomba kweniso wa kudumbiskana na ŵanyake fundo ya pa 1 Ŵakorinte 13:8, iyo yikuti: “Chitemwa chikumara yayi.”

3. April 28, 2021

   Ŵamazaza ŵakamupa mulandu Kirill. Svetlana pamoza na ŵadumbu ŵanyake ŵanayi, nawo ŵakaŵajulira mulandu

4. May 19, 2021

   Yumoza wa ŵa FSB uyo wakafufuzako milandu iyi, wakapikapo mulandu wakuti wakawofyanga ŵakaboni, ndipo wakapelekanga ukaboni wautesi wakukhwaskana na Ŵakaboni ŵa Yehova. Mulara wa Dipatimenti Yakufufuza Milandu wakati mulandu uwelereso kwa wakwimira boma pa milandu kuti ŵakawufufuze makora

5. June 7, 2021

   Mulandu ukambikaso ndipo ŵamazaza ŵakaluta nawo ku Khoti la Mayskiy

Nga ni Kirill, tili na chigomezgo chose kuti Yehova waŵenge “chigongwe chakukhora mu nyengo za suzgo” kwa iyo kweniso ku ŵabali na ŵadumbu wose awo ŵakuzizipizga nthambuzgo ku Russia na Crimea.—Salimo 9:9, 10.