Pa September 25, 2020, * Khoti la Yelizovsky ilo lili ku Chigaŵa cha Kamchatka lizamupeleka cheruzgo chake pa mulandu wa Mubali Konstantin Bazhenov na muwoli wake, Snezhana, pamoza na Mudumbu Vera Zolotova. Wakwimira boma pa milandu wapempha khoti kuti lidumure kuti Mubali na Mudumbu Bazhenov ŵalipire ndalama zakukwana madola 7,850, gha ku America. Ndipo Mudumbu Zolotova walipire ndalama zakukwana madola 5,235 gha ku America.

Konstantin Bazhenov

• Chaka cha kubabikira: 1977 (Petropavlovsk-Kamchatsky, Chigaŵa cha Kamchatka)

• Mbiri Yake: Ndiyo ni mulara mu banja la ŵana ŵanayi. Wakagwirapo ntchito ya umakanika kweniso wakasambizganga pa koleji yinyake. Wakutemwa kuŵeja somba

• Mu 2001 wakatorana na Snezhana, uyo nayo wakaŵa msambizgi. Ŵali na mwana msungwana zina lake, Elizabeth. Banja ili likuteŵetera Yehova

Snezhana Bazhenova

• Chaka cha kubabikira: 1977 (Shikotan Island, Sakhalin Oblast)

• Mbiri Yake: Wakalereka na mupapi yumoza. Wakutemwa ŵana kweniso wakakondwanga kusambizga ku sukulu ya pulayimare. Pasono, ŵali kumukanizga kusambizga ŵana chifukwa chakuti ŵakuti wali na mulandu.

• Wakasambira vya Chiuta kweniso umo wangalombera kufuma kwa abuya ŵake. Ivi vikamovwira kuti wambe kutemwa Chiuta na Baibolo.

Vera Zolotova

• Chaka cha kubabikira: 1946 (Yelizovo, Chigaŵa cha Kamchatka)

• Mbiri Yake: Wakakulira mu banja likuru. Mu 1966 wakatengwa kwa Yuri Zolotov. Ŵali na ŵana ŵaŵiri. Wakaŵapo akauntanti. Wakutemwa kutembeya, kuseŵera mu chiwuvi na pa maji gha kukhoma

• Kwa vyaka vinandi wakakhumbanga kuti wamumanye makora Chiuta. Wali kusopapo mu visopa vyakupambanapambana. Wakakondwa chomene kumanya kuti Chiuta ngwaurunji ndipo wakutemwa ŵanthu. Mfumu wake wakaŵa Kaboni wa Yehova yayi. Kweni, wakakondwa chomene kuwona umo Baibolo lawovwilira muwoli wake

Pa August 19, 2018, Ŵapolisi ŵakasecha nyumba zitatu za Ŵakaboni ŵa Yehova mu tawuni ya Yelizovo. Ŵabali na ŵadumbu 11 ŵakakakika. Ŵakaŵafumba mafumbo kwa maora ghanandi. Pamanyuma, Ŵakaboni 8 ŵakaŵafumiska. Kweni ŵamazaza ŵakati Mubali Bazhenov, muwoli wake, na Mudumbu Zolotova ŵali na mulandu. Ŵakaŵajalira mu jele kulindilira kuti mulandu wawo weruzgike. Pati pajumpha mazuŵa ghaŵiri, ŵadumbu ŵakaŵafumiska. Mweruzgi wakati Mubali Bazhenov wakhale mu jele mwenemumo. Ŵakamufumiska pamanyuma pa mazuŵa 8.

Apo ŵakulindilira chigamuro chawo, tikulomba kuti mbumba ya mubali Bazhenov pamoza na Mudumbu Zolotova ŵalutilire kuŵika chigomezgo chawo chose mwa Yehova. Baibolo likutisimikizgira kuti Yehova waŵapenge ŵakugomezgeka ŵake chimwemwe na mtende, ‘mwakuti kwizira mu nkhongono ya mzimu utuŵa ŵaŵe na chigomezgo chikuru.’—Ŵaroma 15:13.