Pa January 22, 2020, Khoti lizamweruzga mulandu wa Mubali Roman Markin na Viktor Trofimov. Loya wa boma wakupempha khoti kuti lidumure kuti ŵabali aŵa ŵakagwire jele vyaka 6 na hafu.

Mulandu wa ŵabali aŵa ukamba pa April 18, 2018, mu msumba wa Polyarny ku Russia, apo ŵapolisi awo ŵakavwara vyakujibisa kumaso ndipo ŵakayegha vilwero ŵakanjira mu nyumba za ŵabali aŵa, nakwamba kusecha mu nyumba izi. Ŵapolisi aŵa ŵakiza usiku ku nyumba kwa Mubali Markin na kuswa chijaro. Ŵati ŵanjira mu nyumba, ŵakawofya Mubali Markin na futi, ndipo ŵakachichizga Mubali Markin kuti wagone pasi apo iwo ŵakasechanga mu nyumba yake. Mwana msungwana wa mubali uyu, uyo wali na vyaka 16 wakaŵapo apo ivi vikachitikanga ndipo nayo wakagona pasi uku wajara ku maso na mawoko.

Pa usiku wenewuwu Ŵapolisi ŵakanjiraso mu nyumba zinyake zinayi za Ŵakaboni ku Polyarny. Ŵapolisi aŵa ŵakakaka ŵabali na ŵadumbu ŵakujumpha 12 ndipo pa gulu ili pakaŵa mubali Markin na Mubali Trofimov ndipo wose ŵakaluta nawo ku polisi kuti ŵakaŵafumbe mafumbo. Pamanyuma Khoti la Murmansk ilo lili mu msumba wa Polyarny likati ŵabali na ŵadumbu aŵa ŵakajalirike mu jele m’paka apo mulandu wawo uzamweruzgikira. Ŵabali aŵa ŵakakhala mu jele pafupifupi myezi 6, pamanyuma ŵakaŵa pa jele la panyumba kwa myezi yinayi. Pa February 7, 2019, khoti likaŵafumiska pa jele la panyumba. Nangauli ŵabali aŵa ŵaliso pa jele la panyumba yayi, kweni ŵakuzomerezgeka yayi kwenda panji kuchezga mwakufwatuka na ŵanthu ŵanyake apo ŵakulindilira cheruzgo ku Khoti.

Pali Ŵakaboni pafupifupi 3000 ku Russia awo boma likuti ŵali kupalamura mulandu. Tikulomba kuti mphanyi wose ŵalutilira kulongora chikanga na kuŵa ŵankhongono ndipo tili na chigomezgo chose kuti palije icho chingaŵapatura ku chitemwa cha Yehova.—Ŵaroma 8:38, 39.