Khoti la ku Komsomolsk-on-Amur lipelekenge chigamuro chake sonosono apa pa mulandu wa Mubali Nikolay Aliyev. a

Nikolay Aliyev

• Chaka cha kubabikira: 1978 (Komsomolsk-on-Amur)

• Mbiri yake: Apo wakaŵa muchoko, wakajifumbanga umo umoyo ukambira kweniso umo vinthu vyose vikaŵirako. Ivi vikapangiska kuti wapenje mazgoro kufuma mu Baibolo. Wakaleka maseŵera gha mbembe wati waghanaghanirapo ivyo Yesu wakasambizga pa nkhani ya mtende kweniso chiyelezgero icho wakalongora. Wakabatizika na kuŵa Kaboni wa Yehova mu 1993

  Wakatorana na muwoli wake, Alesya, mu 2016. Ŵakutemwa vinthu vinandi kusazgapo, kwenda malo ghakupambanapambana, kutembeya na kuseŵera mu chiwuvi

Mulenji wa pa May 22, 2020, ŵapolisi ŵa mu msumba wa Komsomolsk-on-Amur ŵakasecha nyumba ya Nikolay na Alesya. Apo ŵapolisi aŵa ŵakanjiranga mu nyumba, ŵakamutimba na kumuwiskira pasi Nikolay ndipo ŵakasecha kwa maora 5, paumaliro ŵakaŵakaka na kukaŵajalira mu selo. Apo ŵakaŵafumbanga mafumbo, ŵamazaza ŵakaphalira Nikolay kuti waleke chisopa chake na kunjira chinyake. Iwo ŵakaphaliraso Alesya kuti wapulikire waka ivyo ŵamuphalirenge mwakuti “chinyake chiheni chileke kumuchitikira” mfumu wake. Nangauli ŵakaŵawofya nthena, kweni ŵakaŵafumiska mise yeneyira ndipo ŵakawelera ku nyumba yawo.

Nikolay wakusanga nkhongono para wakughanaghanirapo nthowa zinandi izo Yehova wamovwilira mu nyengo yakusuzga iyi. Iyo wakuti: “Para wasangana na viyezgo, ukuwamo kuti pawekha palije icho ungachitapo. Nkhajiwonera nekha umo Yehova wakuzgolera malurombo kweniso kutilongozga. Nkhakhorwa kuti mazgu agho Paulosi wakayowoya ngaunenesko, mazgu agha ghakuti: ‘Pakuti para nili wakulopwa, apo ndipo nkhuŵa wankhongono.’”—2 Ŵakorinte 12:10.

Nikolay na Alesya ŵakulutilira kusanga nthowa za umo ŵangachitira kuti ŵaŵe na chikanga kweniso ŵalutilire kuŵa na mtende wa mu mtima. Iwo ŵali kupulinta lemba la Yesaya 41:10 na kulibatika pa fuliji. Nikolay wakuti: “Para nawona kuti vinthu vili makora yayi, nkhuŵerenga vesi ili, ndipo nkhujipulika makora. Mazgu agha ghakunichiska kuti nileke kopa. Icho chikunikhozga chomene ntchakuti Yehova wakunisimikizgira kuti wali nane, wali pafupi chomene mwakuti nkhujipulika nga kuti wanihaga waka na woko lake lamalyero kweniso kuti ndine mubwezi wake wa pamtima.” Tili na chigomezgo chose kuti Yehova walutilirenge kuŵapa nkhongono ŵateŵeti ŵake ŵakugomezgeka.