APRIL 20, 2023
RUSSIA

Mubali Okhapkin Wakakhozgeka Pakuwona Chilengiwa

JULANI

Khoti la Kineshemskiy ilo lili ku Chigaŵa cha Ivanovo sonosono apa lipelekenge chigamuro chake kwa Mubali Andrey Okhapkin. Wakwimira boma pa milandu wachali wandapemphe chilango icho Mubali Andrey Okhapkin wangapika.

Vyakukhwaskana na munthu uyu

Andrey Okhapkin

Chaka cha kubabikira: 1962 (Zavolzhsk, Chigaŵa cha Ivanovo)

Mbiri yake: Wakagwiranga ntchito yakupanga mapulogiramu ya pa kompyuta kweniso wakaŵa msambizgi

Wakatorana na Irina mu 1987. Irina wakamba kusambira Baibolo na Ŵakaboni ŵa Yehova mu 1994. Andrey nayo wakamba kusambira Baibolo wati wakhorwa kuti kuli Mlengi. Wose ŵaŵiri ŵakabatizika mu 1995

Ivyo Wakayowoya

Kasi ntchivichi chikamovwirani kuti muleke kugongowa apo mukaŵa pa jele la panyumba?

Nkhalombanga mwakudunjika kwa Yehova, ndipo ivi vikanovwira kuti nileke kwenjerwa. Kweniso para nagongowa, nkhaghanaghaniranga vya Yobu. Yehova wakagwiliskira ntchito ivyo wali kulenga kuti wamanyiske Yobu za mikhaliro yake yapadera iyo wali nayo. Ntheura ndivyo nane nkhachitanga. Nkhutemwa chomene kuwonelera umo zuŵa likufumira. Nkhuwoneseska chomene mabingu, mlengalenga, na makuni. Nkhukondwa kuwona umo viyuni vikudukira. Nkhuwonelera umo ŵachona na ntcheŵe vikukhalira. Nkhamara myezi pafupifupi 5 kuwona umo vinthu ivi vikuchitira. Ivi vikanovwira kuti nipulikiske makora mikhaliro ya Yehova kwizira mu chilengiwa. Ndipo sono nkhupulikiska makora umo Dada withu Yehova wakutitemwera.

Kasi ŵanji ŵamovwirani wuli kuti muzizipizge masuzgo?

Apo nkhaŵa ku jele nkhapokera kalata kufuma kwa mubali uyo wakaŵa ku jele. Iyo wakalemba kuti: “Ŵanthu ŵakunifumba kuti ‘Kasi ukuchita wofi?’ Para ningayowoya kuti yayi, mbwe nateta. Kweni tikwenera kutonda wofi, lekani chikanga ntchakukhumbikwa. Pakuŵa ŵateŵeti ŵa Yehova, tikumanyikwa na chikanga. Kweni para tilije, Yehova wakutipa. Kumbuka kuti chinthu chakuzirwa chomene nkhuŵa na chipulikano chakukhora, kuti ni ukuru wa masuzgo yayi.” Para nkhuŵerenga ivyo vikamuchitikira kweniso ivyo vikachitikira ŵanthu ŵanyake vikunikumbuska kuti chakuzirwa chomene nkhukhozga ubwezi wane na Yehova na kuzuzga mtima na maghanoghano ghane na mazgu gha Chiuta.

Nga Andrey, nase tikuwonga “milimo yakuzizwiska ya Chiuta” iyo yikutikumbuska chitemwa icho Yehova wali nacho pa ise.—Yobu 37:14.

Nyengo

November 18, 2021

Khoti likamupa mulandu
November 23, 2021

Ŵakasecha nyumba 6 za Ŵakaboni ŵa Yehova, pamoza na nyumba ya Andrey. Ŵakamukaka na kumuŵika mu jele
November 24, 2021

Wakapika mulandu
November 25, 2021

Ŵakamuŵika ku jele lakulindilirako awo milandu yawo yinderuzgike
February 17, 2022

Wakafumiskika mu jele ndipo wakaŵikika pa jele la panyumba
July 14, 2022

Wakafumiskika pa jele la panyumba ndipo wakakanizgika kwenda kufuma mu chigaŵa icho wakakhalanga
December 15, 2022

Khoti likamba kutegherezga mulandu wake

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI