Pa February 1, a 2021, Khoti la Abakan ilo lili ku Republic of Khakassia lingazakapeleka chigamuro chake pa mulandu wa Mubali Roman Baranovskiy na amama ŵake a Valentina Baranovskaya. Wakwimira boma pa milandu wandapemphe chilango icho khoti lingaŵapa.

Roman Baranovskiy

• Chaka cha kubabikira: 1974 (ku Balakovo, chigaŵa cha Saratov)

• Mbiri yake: Iyo wakugwira ntchito yakunozga nyumba izo zanangika kuti wajipwelelere iyo na amama ŵake. Wakutemwa kulizga gitara, kuseŵera tchesi na bola

  Apo iyo wakaŵa muwukirano, wakajifumbanga usange umoyo uli na phindu. Iyo wakukumbuka makora kuti, “Nyengo zinyake nkhapemphanga Chiuta kuti wanovwire kumanya usange umoyo wuli na phindu.” Mu 1993, nkhamba kusambira Baibolo na Ŵakaboni ŵa Yehova. Ndipo mu 1997 nkhabatizika.

Valentina Baranovskaya

• Chaka cha kubabikira: 1951 (ku Vannovka, Kazakhstan)

• Mbiri yake: Wakaŵapoakauntanti kweniso wakawovwiranga ŵanthu umo ŵangagwiliskira makora ntchito ndalama. Ndipo wakapumura ntchito mu 2006. Wakutemwa kuphika na kulemba sumu na mapowemu

  Mu 1995, iyo pamoza na mwana wake ŵakamba kusambira Baibolo na Ŵakaboni ŵa Yehova. Wakakondwa chomene wakati wasambira kuti Chiuta wangateta yayi. Ndipo wakabatizika mu 1996

Usiku wa pa April 10, 2019, ku chigaŵa cha Abakan, ŵapolisi ŵakasecha mwakuchichizga nyumba za ŵabali ŵanayi, pamoza na nyumba ya Mubali Roman Baranovskiy na amama ŵake, a Valentina. Ŵapolisi ŵakapoka Mabaibolo, mafoni na vinthu vinyake. Ŵapolisi aŵa ŵakati mubali uyu na amama ŵali na mulandu.

Mubali Roman wakukumbaka makora kuti: “Apo ŵakasechanga mu nyumba yithu, tikaŵa kuti tili mukati mwakuchita maungano gha mukati mwa sabata ndipo tikaŵa kuti tadumbiskana waka lemba la 1 Ŵakorinte 10:13. Pa lemba ili pakaŵa fundo yakuzirwa chomene yakuti, ni Yehova yayi uyo wakugaŵira munthu chiyezgo. . . Iyo wakughanaghanapo yayi kuti: ‘Wamunthu iwe uli wakukhora, ukwaniskenge kuzizipizga chiyezgo ichi. Kweni iwe, uli wakulopwa, chiyezgo icho ungakwaniska kuzizipizga ni ichi.’ Usange ndimo wachitirenge, mphanyi tikuthemba nkhongono zithu zakuzizipizgira. Tose tingasangana na viyezgo vyakupambanapambana. Ndipo tingakwaniska kuzizipizga para tingathemba nkhongono za Yehova.”

Mu July 2020, Mudumbu Valentina wakalwara sitiroku. Iyo wakukumbuka kuti: “Apo vinthu vikafika paheni chomene chifukwa cha ulwari wane, ndipo nkhajiwoneranga ndekha ukaboni wakuti Yehova wakunovwira. Vikaŵa nthena chifukwa chakuti nkhalekapo yayi kulomba, ndipo nkhawonanga nga wachita kuninyamura mu mawoko ghake. Panyengo iyi nkhaŵa na mtende ukuru wa mtima.”

Para wakughanaghanira za masuzgo agho wakumana nagho, kweniso umo Chiuta wamovwilira, Mudumbu Valentina wakumalizga na mazgu ghankhongono ghakuti: “Naŵikapo mtima kuteŵetera Adada ŵithu, na kulutilira kugomezga kwa iwo nanga ningasangana na masuzgo wuli pa umoyo wane.”

Mubali Roman wakuti chipulikano chake chikukhora chomene para wakughanaghanirapo za ŵateŵeti ŵa Chiuta awo ŵakuzunulika mu Baibolo awo nawo ŵakazizipizga masuzgo ghanandi kweniso na ŵateŵeti ŵamazuŵa ghano. Para wakughanaghanira za chiyelezgero chawo, kanandi wakujifumba kuti: ‘Kasi ŵakazizipizganga masuzgo wuli, ndipo chifukwa wuli? Ntchivichi chikaŵawovwira kuti ŵalutilire kugomezgeka? Kasi Yehova wakaŵawovwira wuli na mzimu wake?’ Mazgoro gha mafumbo agha ghamovwira chomene Mubali Roman kugomezga kuti nanga wangasanga na suzgo likuru wuli, “Yehova wamupenge nkhongono zakuluska zakawiro kuti wazizipizga suzgo lake.”

Tikulomba kuti mphanyi Mubali Roman na Mudumbu Valentina, pamoza na ŵabali na ŵadumbu wose ku Russia ŵalutilira kuthemba Yehova kuti waŵe chiphokwero chawo na nkhongono zawo.—Salimo 46:1.