Pa December 17, 2020, * Khoti la Leninskiy ilo lili ku Rostov-on-Don lizamupeleka chigamuro chake pa mulandu wa Mubali Ruslan Alyev. Wakwimira boma pa milandu wakupempha khoti kuti leruzge kuti Mubali Ruslan waleke kusangikaso na mulandu kwa vyaka vitatu.

Ruslan Alyev

• Chaka cha kubabikira: 1987 (Chunoyar, Chigaŵa cha Krasnoyarsk)

• Mbiri yake: Mbumba yakwake yikatemwanga kusamukasamuka, kukakhala ku Azerbaijan na Ukraine. Wagwirapo ntchito yakuzenga, yakuwona vyamalonda, kusambizga ŵanthu kulizga gitara, na yakusambizga Chingelezi na Chitchayinizi. Wakutemwa maseŵera, kulemba mapowemu na sumu. Wakuyowoya viyowoyero vinayi. Muwoli wake, Kristina, nayo wakuyowoya Chitchayinizi

  Wakamba kuŵerenga na kusambira Baibolo wali na vyaka 13. Apo wakalutiliranga kuŵerenga, wakawona kuti mazgoro gha mafumbo ghake ghakukhwaskana na umoyo ghakusangika mu Baibolo. Ivi vikapangiska kuti wajipeleke kwa Chiuta na kubatizika mu 2006

Pa June 6, 2019, ŵamazaza ŵakati Mubali Ruslan Alyev wali na mulandu, ndipo pa June 10, 2019, ŵakamusunga mu jele. Ŵati ŵamusunga kwa maora 24, Ruslan na mubali munyake zina lake Semyon Baybak, ŵakaŵatuma pa jele la panyumba. Pakwamba ŵakati Ruslan wakhale pa jele ili kwa masabata 8, kweni ŵakasazgirako nyengo iyi maulendo 9. Ivi vyapangiska kuti wakhale pa jele ili kwa myezi 18. Apo wali pa jele la panyumba ili, Ruslan wangachezga na waliyose yayi kupaturapo loya wake, uyo wakufufuza mulandu wake, uyo wakumuwonelera, na muwoli wake. Wakuzomerezgeka yayi kugwiliskira ntchito Intaneti, panji kutumizga na kupokera makalata, maimelu na mameseji.

Ruslan wakuti pambere ŵandamukake na kumusunga mu jele, iyo na muwoli wake, Kristina, kanandi ŵakadumbiskananga kuti nawo nyengo yinyake ŵangazakasangana na nthambuzgo zanthena izi. Iyo wakuti: “Tikawoneseska kuti tili na ndondomeko yakukhazikika ya kuchitira vinthu vyauzimu. Tikamanyanga ivyo vingachitika usange tingasangana na nthambuzgo chifukwa ndivyo tikaŵerenganga mu Mabuku Ghapachaka na nkhani zinyake zakulongosora umoyo wa ŵanthu. Tikawona kuti ŵakalutiliranga kuŵa ŵakukondwa ndipo ŵakagongowanga yayi nangauli ŵakatambuzgikanga.” Ruslan wakutiso: “Tikalomba Yehova kuti watipe nkhongono zakuzizipizgira masuzgo ghose agho tingazakakumana nagho munthazi.”

Ruslan wakadumbiskanangaso na ŵabali ŵanyake vya nthambuzgo izo zingaŵachitikira, ndipo ivi vikamovwira chomene. Iyo wakuti, “Nkhapenjerezga fundo zinandi zakukhozga mu Baibolo kweniso nkhani zinyake zakukhozga kuti nkhawovwire nazo ŵapharazgi ŵa mu mpingo mwithu. Mbwenu para naneso nkhukhumba kukhozgeka, fundo za mu malemba na nkhani zakukhozga izo nkhasanga na kusunga mu mtima ndizo zikanovwirangaso.”

Ruslan na Kristina ŵakawovwirika chomene chifukwa cha kunozgekerathu nthambuzgo izo ŵangazakasangana nazo munthazi. Ulendo unyake apo ŵamazaza ŵakasechanga nyumba yawo, Ruslan wakuti: “Mtima ukaŵa m’malo nkhafipanga mtima na chilichose yayi.” Nyengo yinyake apo ŵakafufuzanga, wamazaza wakamofya Kristina kuti ŵangati nayo wali na mulandu. Ruslan wakuti “Muwoli wane Kristina wakatenthemapo yayi nanga ni apo ŵakamofya kuti ŵangamupa mulandu. Ivi vikanikhozga chomene ndipo vikanipa nkhongono kuti nizizipizge.”

Umoyo wa Ruslan na muwoli wake wakhwaskika chomene chifukwa chakuti Ruslan wali pa jele la panyumba ili. Kweni Ruslan wakuti: “Nyengo zose Yehova wakutipa ivyo tikukhumbikwira kuti tiŵe na umoyo, tilutilire kuŵa nayo paubwezi, kweniso kuti mtima uŵe m’malo, nakuti ivi ndivyo nkhakhazganga. Kumasinda uku tikasambira kale kuthemba Yehova na kukhala umoyo wambura kukhumba vinandi. Ntheura apa tikwenjerwa chomene na umoyo yayi.”

Ulendo unyake apo khoti likategherezganga mulandu wake ndipo likasazgirako utali wa nyengo iyo wakwenera kukhala pa jele la pa nyumba, ŵabwezi ŵake ŵakazomerezgeka yayi kunjira. Kweni ŵabali na ŵadumbu ŵakakhala waka pawaro pa khoti kumulindilira, ndipo apo wakafumanga ŵakachemerezganga kuti: “Ruslan, tili nawe lumoza mu nyengo yakusuzga iyi!”

Tikukhozgeka chomene na chiyelezgero chiwemi cha ŵabali na ŵadumbu ŵithu ku Russia. Nangauli ŵakutambuzgika kwambura chifukwa, kweni ŵakulutilira kulongora kuti ŵakugomezga chomene Yehova.—Salimo 118:6-9.