Pa December 18, 2020, * Khoti la Leninskiy ku Rostov-on-Don lizamupeleka chigamuro chake pa mulandu wa Mubali Semyon Baybak. Wakwimira boma pa milandu wapempha khoti kuti limupe chilango chakuti wakhale vyaka vinayi kwambura kusangikaso na mulandu.

Semyon Baybak

• Chaka cha kubabikira: 1997 (Rostov-on-Don)

• Mbiri Yake: Wali na mukuru kweniso mudumbu wake, uyo ni mulara kwa iyo. Wali kusambira Chitchayinizi ndipo wakugwira ntchito yakusambizga ŵanthu chiyowoyero ichi. Wakutemwa kuŵazga na kulemba mapowemu

• Ŵapapi ŵake ŵakamusambizga vya Yehova apo wakaŵa muchoko. Apo wakakuranga, wakasambira ulongozgi wa vinjeru wa mu Baibolo, ndipo wakasankha kuti wachitenge ivyo wakusambira. Iyo wakakana kunjira usilikari chifukwa cha njuŵi yake. Kufuma waka mu 2015 m’paka mu 2017, wakagwiranga ntchito ya ukilinala pa chipatala cha ŵana, ntchito iyo yikukolerana yayi na usilikari

Pa May 22, 2019, ŵapolisi awo ŵakulimbana na vigeŵenga ŵakasecha nyumba 13 za Ŵakaboni ŵa Yehova ku Rostov-on-Don. Pakati pajumpha masabata ghaŵiri, pa June 6, 2019, ŵapolisi ŵakati Mubali Semyon wali na mulandu. Kufuma apo, ŵapolisi ŵakamukaka na kumusunga mu selo kwa zuŵa limoza, ndipo khoti likadumura kuti wakakhale pa jele la panyumba. Pakwamba ŵakamuphalira kuti wakhale pa jele la panyumba kwa masabata 8, kweni nyengo iyi ŵakayisazgirako maulendo 7.

Pakwamba ŵapolisi ŵakati Semyon wali na “mulandu” chifukwa cha kuchita maungano gha chisopa chake kweniso kuphalirako ŵanyake ivyo wakusambira mu Baibolo. Mu November 2019, ŵakamuphaliraso kuti wali na mulandu wakupeleka ndalama zakovwira gulu “lakuchita vinthu mwakutalulira.”

Nangauli ŵabali ŵithu ŵachali kutambuzgika ku Russia, kweni tikumanya kuti Yehova uyo ni “Chiuta wa mtende,” walutilirenge kuŵapa vyose ivyo ŵakukhumbikwira kuti ‘ŵachite khumbo lake.’—Ŵahebere 13:20, 21.